Miércoles. 19.06.2019 |
El tiempo
Miércoles. 19.06.2019
El tiempo

Redactora de El Progreso na sección de Local. Especialista en información da área municipal. Tamén podes seguirme na miña conta de Twitter.

Rozas volve ao cuartel

O veterano edil do PP deixa a primeira liña o venres tras máis de 30 anos e varias decepcións

Enrique Rozas. J.VÁZQUEZ
Enrique Rozas. J.VÁZQUEZ

DESPOIS de máis de trinta anos vinculado dun xeito ou doutro ao Concello de Lugo, Enrique Rozas deixará de estalo dende o vindeiro venres, cando cesará toda a corporación e o persoal eventual. O luns volverá ao seu posto na subdelegación de Defensa, unha institución coa que por natureza ou por contaxio Rozas comparte cualidades, dende a disciplina á cerimonia. O aínda concelleiro do PP é cortés no persoal e no político. Na parte pública foino sempre. Na privada, case sempre. O enfrontamento que dende 2011 mantivo co entón voceiro, Jaime Castiñeira, seguramente sacou a parte menos amable que Rozas, como calquera, leva dentro.

Un dos empeños do político en todo este tempo foi negar o termo enfrontamento para referirse ás diferencias que mantivo con Castiñeira e que acabaron trasladándose ao grupo municipal. Pero enfrontamento non hai dúbida de que foi, outra cousa é quen o provocara e quen o alimentou. Castiñeira seguramente non foi claro co edil cando en 2011 o levou na candidatura para despois deixalo sen dedicación exclusiva do Concello, que era tanto como apartalo da primeira liña e da rúa —co que Rozas gusta de ámbalas dúas— polas dificultades que sabía que tería para compatibilizar o labor político co seu traballo. Rozas rexeitou a media dedicación que lle ofrecía Castiñeira e o baleiro que sufriu nos anos seguintes e a mezcla de queixa e crítica que el verteu foron facendo medrar a bóla de neve.

Daquela e posteriormente houbo quen usou o argumento do diñeiro para tratar de denigralo, e a bo seguro que a Rozas non lle amargaría o caramelo, pero quen o coñeza un pouco tamén sabe que o diñeiro nunca foi o seu principal motor político. Ao aínda concelleiro préstalle máis o recoñecemento público, como o que tivo cando anunciou que marchaba.

Neste caso semella que non foi aquelo que dicía o malogrado Rubalcaba de que neste país se enterra moi ben, ou non foi só iso. O aprecio —dunhas dimensións poucas veces vistas nesta cidade— que lle demostraron publicamente veciños e políticos de todas as cores é sinceiro. Cidadáns e adversarios valoraron a cercanía, a dedicación e as ganas que sempre lle puxo á función pública, recoñecidas incluso por quen non comulga con el. Iso non quita que as maneiras de Rozas gusten a todo o mundo nin que a súa forma de traballar sexa a idónea en tódolos aspectos. Pode ser o máis dedicado colaborador e, ás veces, tamén un factor desestabilizador, din algúns que o saben.

Rozas sentiuse utilizado e enganado varias veces máis. Como cando se volcou con Elena Candia na loita pola dirección provincial. Pode que decantara a súa victoria cos apoios de Lugo e non sentiu recoñecida a contribución. A continuación, o partido apostou, e el accedeu, por Ramón Carballo para a dirección local. O seguinte paso foi a renuncia de Castiñeira á portavocía municipal e, de novo, o partido non o elixiu a el senón a Antonio Ameijide. O resto xa é coñecido tamén. Carballo foi alcaldable e, véndoas vir, Rozas decidiu marchou.

As formas ata o último día
ROZAS optou por marchar da política de xeito elegante e un exemplo foi que acompañou ao voceiro, Antonio Ameijide, ao xulgado o día que estaba citado a declarar pola denuncia contra o goberno polos contratos caducados. Rozas non comulga, ou eso se intúe, coa decisión do seu grupo, pero foi unha das poucas persoas que acompañou a Ameijide, coa que son coñecidas as súas diferencias. Non o fixo Carballo.

 

Unha marcha que aliviou
O novo voceiro do PP non cre que a renuncia de Rozas tivera influencia no resultado electoral, nin para ben nin para mal. O concelleiro ten fans, pero tamén detractores, e especular con que tería pasado é só iso, especulación. O que é certo é que nas filas do PSOE o anuncio de que marchaba aliviou, e iso algo quere dicir, sobre todo porque o natural non é que os socialistas pesquen nos caladoiros do PP.

 

En política dende os 26
Rozas cumpriu 62 anos e leva dende os 26 vinculado ao Concello case de xeito ininterrumpido. A esa idade empezou a colaborar co alcalde Vicente Quiroga en Deportes; en 1987, nomeouno xerente do patronato respectivo, ata 1999. Cinco anos despois volveu como edil, acta que deixará o venres. Durante o curto mandato de Candia na Deputación foi proposto para xerente do consorcio provincial de bombeiros.

Rozas volve ao cuartel
Comentarios