"O que pido é que me deixen traballar", dicía hai uns días nunha entrevista a concelleira de gobernanza, Paula Alvarellos, nese momento aínda tamén responsablede urbanismo por ausencia do seu titular, Álvaro Santos. En realidade foi unha frase que veu repetindo durante o último ano, cada vez que a oposición, diversos colectivos profesionais e particulares se queixaban da lentitude e da complicación para obter permisos de obras e para que saíran adiante proxectos de cidade que levan lustros, cando non máis, atascados.
Pero chegou a primavera e, a pesar de ser época de semente, semella que o Concello empeza a colleitar. Santos volveu para presentar o froito do traballo realizado nos últimos meses. O goberno de Lara Méndez anunciou que o procedemento para aprobar a parte do PXOM que leva en suspenso dende hai once anos entrou na recta final. Como o proceso para descatalogar e poder derrubar o edificio que Correos ten a carón da estación de tren, paso necesario para construír a terminal intermodal. Aínda que o principal freo a este proxecto é a falta de entendemento entre a Xunta e Adif para cofinancialo, algo que debería resolverse na reunión en Madrid do día 20.
Este verán, a cidade verá, ao fin, a mal chamada praia fluvial, sobre a que correron ríos de tinta. E esta semana, o goberno local anunciou a próxima contratación dos arranxos do novo auditorio. Arrincou tamén a construción da glorieta de acceso ao campus na N-6, está a piques de abrirse a pasarela do centro de saúde de San Roque, as peonalizacións avanzan por vía dobre, a da concellería de infraestruturas (BNG) e a dos fondos europeos (PSOE), e, aínda que con controversia, despois de trinta anos chegaron as obras á fea
A maioría destes proxectos levan tanto retraso e algúns foron tan difíciles de sacar adiante que é fácil caer na compracencia cando por fin se pode dar conta deles, cando non hai moito lugar para ela. Resulta tentador tamén descargar a responsabilidade das demoras dalgúns destes proxectos noutras administracións. Tivérona, pero non en exclusiva.
