miércoles. 21.08.2019 |
El tiempo
miércoles. 21.08.2019
El tiempo

Redactora de El Progreso na sección de Local. Especialista en información da área municipal. Tamén podes seguirme na miña conta de Twitter.

Se os funcionarios funcionan

O papel dos traballadores ten igual ou máis incidencia na cidade que a xestión política

Dous axentes prestando un servizo na Ronda da Muralla. J. VÁZQUEZ/AE
Dous axentes prestando un servizo na Ronda da Muralla. J. VÁZQUEZ/AE

DENDE o 27 de maio, o día despois das eleccións municipais, algo cambiou en Lugo. As urnas deron un novo goberno, unha coalición PSOEBNG, pero esta non se formalizou ata hai pouco máis dunha semana e non tivo que ver —ou si, segundo se vexa— en que a cidade volva a ter Policía Local. Hai os mesmos axentes que había, pero agora vense máis; os condutores que aparcan enriba das beirarrúas reciben sancións; xa houbo dispositivos para controlar as molestias da movida nocturna, para frear carreiras ilegais ou para evitar a actividade dos gorrillas, e as empresas que precisan ocupar a vía pública para facer algún traballo obteñen os permisos pertinentes. Os policías acoden, ademais, a chamadas domiciliarias para auxiliar a anciáns que caen e non se poden levantar, un exemplo de servizo que prestan moi a miúdo, que moitos cidadáns descoñecen e do que agora se informa.

O que cambiou é que a Policía Local levaba case medio ano sen mando e incorporouse ao posto, tras unha longa baixa médica, o inspector Jesús Piñeiro, que leva case 40 anos no corpo e ten dúas cualidades necesarias para ser xefe, querer selo e ter o respecto dos subordinados. O da Policía Local é un exemplo, pero non o único, de que non depende só dos políticos que unha cidade funcione. Probablemente ten moita máis trascendencia a profesionalidade e a implicación dos traballadores das administracións. Aínda que nisto, é obvio, Se os funcionarios funcionan teñen moito que ver os gobernos, que son os que teñen que trazar e que priorizar as accións e os que, xunto ás organizacións sindicais, teñen a responsabilidade de xestionar o persoal.

Se o Concello de Lugo é líder na captación de fondos europeos dende hai lustros é porque hai un eficaz equipo de desenvolvemento local, pendente de convocatorias, avezado na presentación de proxectos e ben engrenado con outros departamentos, como medio ambiente e urbanismo. Os éxitos xudiciais que dende hai un tempo acada o Concello en contenciosos de distinto calado —aprobación dos orzamentos de 2018, nomeamento do anterior director xeral de recursos humanos, anulación dun contrato a unha empresa por incumprimento de cláusulas sociais...— di ben da asesoría xurídica municipal, pero tamén dos funcionarios que fixeron os correspondentes procedementos administrativos, o mesmo que no caso do arquivo da denuncia penal do PP polos contratos caducados.

O plan de loita contra o xabaril na cidade, que liderou a Consellería de Medio Ambiente, semella insuficiente para controlar o censo deste animal salvaxe e evitar os danos que provoca nos cultivos e nas estradas, pero de momento cumpriu o fin que perseguía, que era afastalo da cidade. Fíxoo, ademais, cunha discreta e eficaz coordinación con outras administracións. A pregunta é por que o funcionamento dos servizos públicos é noticia e canta responsabilidade teñen os funcionarios e canta os políticos en que as administracións funcionen.

Jácome e a "guerra xurídica"

A JÁCOME chegáronlle uns días na alcaldía de Ourense para ver "o caos" e a "guerra xurídica" que, di, hai no Concello. Traballadores que non están na súa praza senón noutra, procedementos que dificultan a xestión, técnicos con criterios distintos sobre un mesmo asunto... O charlatán rexedor describiu unha situación que se dá en moitos concellos, coa que tamén se topou Lara Méndez e que o BNG descobre agora.

Cortesía entre os socios

O BIPARTITO de Lugo empezou a rodar sen dificultade aparente e con bastante cortesía entre os socios. O BNG lanzouse a visitar e a anunciar obras que deixara preparadas o goberno socialista, e así o sinala nas notas informativas, que poden ter distintas lecturas. Dise que o traballo estaba empezado e á vez evidénciase a lenta xestión dos seus antecesores. As coalicións, como as parellas, para o bo e para o malo.

Asesores do bipartito

PSOE e BNG ultiman os seus equipos no Concello. O BNG abriu un proceso entre a militancia para fichar os seus cinco asesores. Os do PSOE son nove e a maioría repiten. A xornalista e consultora da Coruña María Val, que leva meses traballando coa alcaldesa, será a xefa de gabinete e dunha área de comunicación á que se suma a chantadina María Varela e que prevé contar con algún profesional máis.

Se os funcionarios funcionan
Comentarios