PECHADO o proceso congresual provincial do PP, se é que desta vez vai, os focos de militantes e de cidadáns sen carné viran cara á escena local. A designación e o acerto co candidato é a cada cita que se presenta máis importante se o partido non quere seguir na bancada da oposición na capital e na Deputación. O proceso está tan aberto como algúns queren ver ou máis ben todo o contrario?
O que sucedeu na instancia superior pode que aporte pistas. A presidenta provincial, Elena Candia, fixo inicialmente un equipo con moita presenza da cidade de Lugo pero sen os principais representantes institucionais, como o actual voceiro, Ramón Carballo; o vicevoceiro, Antonio Ameijide, e o delegado da Xunta, Javier Arias, tres dos nomes que soan para a alcaldía.
No equipo de Candia tampouco estaba de primeiras o deputado autonómico e outrora tamén delegado do Goberno galego en Lugo, José Manuel Balseiro, que ten unha gran amizade con Carballo e non deixa pasar a ocasión de lembrar que o actual voceiro do PP no Concello de Lugo foi o candidato de todas as cidades galegas máis votado.
O proceso para designar candidato á alcaldía de Lugo está tan aberto como algúns queren ver ou máis ben todo o contrario?
O peso político do mariñán, o seu coñecemento do partido e a certeza de que a renovación que buscaba Candia ía abrir vías de auga fixeron que Santiago intervira e que a presidenta tivera que dar un xiro de timón. O veterán deputado é hoxe coordinador provincial e voceiro e a súa opinión probablemente contará moito.
Na dirección provincial hai quen cre que, se Carballo logra quitarse o sambenito de que hai dous anos non quería ser candidato, segue sendo a mellor opción que hai sobre a mesa. É unha persoa conciliadora, con experiencia orgánica e institucional (máis desta ca da primeira), a súa traxectoria proba que a política lle gusta máis do que ás veces dá a entender e a sensación que transmite neste momento é que lle colleu gusto tamén á escena municipal, por moi ingrata que ás veces sexa a oposición.
Carballo é veterinario, pero hai moito tempo que non exerce, ten 62 anos e foi impulsado á presidencia da xunta local en 2017, como paso previo á designación como candidato á alcaldía. O mandato vence a próxima primavera e neste momento a renovación do cargo non está na axenda do partido nin a nivel local nin provincial. Tampouco na dirección galega, que nos congresos das cidades ten moito que dicir e adoita lanzar os alcaldables á vez.
Porén, no partido tamén hai quen pensa que non hai motivo para non celebrar o congreso local cando toque e que non se entendería que así fora. Como calquera proceso, mostraría as costuras da formación e permitiría coñecer a opinión dos militantes.
E aquí hai que volver mirar cara á nova dirección provincial. Enrique Rozas, que no pasado aspirou á xunta local e deu un paso atrás, foi nomeado vicesecretario de política municipal. Hai quen ve un sinal e hai quen cre que Candia simplemente recuperou un gran activo para o PP. É un dos políticos lucenses que máis aprezo suscita na rúa. Outra cousa son os votos e que o seu perfil sexa o de alcaldable.