O negativo convenio urbanístico que se tramita fronte á porta de San Pedro, ao que se suma un contencioso de Adega, pon de novo sobre a mesa as disfuncionalidades do urbanismo lucense. O deseño deixouse en mans dos donos do terreo. Foi aprobado despois polo Concello e a Xunta, pero a representación do que alí se prevé facer chama a atención a calquera profano, sen entrar en se cumpre ou non a lei.
É probable que ningún Concello teña a capacidade de poñerse á fronte de todos os seus desenvolvementos urbanísticos, ou que isto incluso exceda as súas competencias, pero parece lóxico que o fixera en zonas de especial interese como esta, con dous Bens Mundiais. O Concello ten neste momento cinco arquitectos, de seis postos existentes, e dous aparelladores, dos tres que inclúe o cadro laboral que aprobou o ano pasado o goberno e que por tanto ve axustado ás necesidades da cidade. Porén, a situación non é a desexable, porque o servizo de arquitectura está sen xefe e a área de urbanismo, sen responsable político propio.
O xefe de arquitectura, cuxo nomeamento en xaneiro por libre designación foi polémico e desembocou na dimisión do concelleiro da área, Miguel Couto, deixou esas funcións en setembro para facerse con outra praza en propiedade a de —xefe adxunto–, pero neste momento tampouco exerce porque está de baixa por enfermidade. O seu papel foille asignado ao traballador con máis experiencia e coñecemento da área.
Do lado político, tras a dimisión de Couto foi nomeado concelleiro de urbanismo Álvaro Santos, e o interventor municipal, Manuel Vázquez, coordinador xeral da concellería, unha figura nova. Dende o verán, Santos tamén está de baixa e mentres tanto a área está a cargo de Paula Alvarellos, concelleira de economía e persoal.
Dende o equipo de Lara Méndez asegúrase que esta situación non está afectando e que o ritmo de traballo non baixou. Explica que está traballando na cobertura das prazas vacantes e nunha reorganización xeral, xa que a alcaldesa é consciente de que é necesario axilizar o funcionamento para facilitarlle a vida aos cidadáns e para xerar actividade económica. Recentemente xa se fixeron algúns cambios, como unha redistribución de funcións entre os traballadores, para que non haxa ningunha que caia unicamente nunha persoa.
O goberno, explica, tamén está traballando na clarificación dalgunha normativa e na unificación de criterios interpretativos, como xa fixo hai uns meses coas rasantes nos plans parciais e co Pepri. Así mesmo, está redactando unha ordenanza sobre concesión de licenzas e outros asuntos, como comunicacións previas de obras e actividades.
Porén, o Colexio de Arquitectos non ve resultado de todo isto. E para proba invita a revisar as licenzas que dá o goberno semanalmente: "Para o rural, para reformas e para ascensores. É moita cantidade, pero a nivel de volume de obra non é substancial", di a presidenta, Carmen Figueiras.
