Axentes da Garda Civil interceptaron en Cangas a unha condutora que circulaba con exceso de velocidade, baixo os efectos da droga e cun bebé no coche, e á que se lle interviñeron 20 gramos de cocaína.
A muller, que está investigada por un suposto delito contra a saúde pública, foi sorprendida cando conducía pola PO-511, no termo municipal de Cangas. Unha dotación de Tráfico deulle o alto ao comprobar que excedía a velocidade máxima permitida na vía.
Ao identificala, os axentes comprobaron que a condutora, que levaba un bebé no asento traseiro, presentaba un evidente estado de nerviosismo e, ao realizarlle a proba de drogas, esta arroxou resultado positivo para cocaína (pendente de ratificar con probas de laboratorio).
No rexistro do vehículo, os gardas atoparon varios envoltorios de plástico con cocaína, cun peso total de 20 gramos, así como unha carteira con útiles para o consumo da droga.
Por todo iso, instruíronse dilixencias por un suposto delito contra a saúde pública, e contactouse co pai do bebé, para que se fixese cargo del.
