As instalacións da Sociedade Galega do Medio Ambiente, Sogama, recibiron ao longo do ano 2013 un total de 3.000 visitas. Deste xeito, suma xa preto de 59.000 persoas que pasaron polos seus centros de tratamento de residuos desde o inicio da súa actividade.
Como é habitual, o colectivo escolar, que supuxo máis dun 55% do total de visitas, é a presencia máis notoria do ránking. Tras el, o universitario, con máis do 18% e o municipal, con preto dun 10%, entre o resto de sectores sociais, cuxa presencia supuxo máis dun 16%.
Por provincias, a maior parte dos grupos procedían, por razóns de proximidade, tal e como a propia Sociedade recoñece, da área da Coruña (51,06%), seguida pola provincia de Lugo (18,09%), Pontevedra (15,96 %) e Ourense (7,45%).
A mesma Sogama celebra as devanditas cifras, tendo en conta que as visitas á súa pranta sempre supoñen un coste ao beneficiario -debe sufragar o transporte ata ela- dentro dun contexto de crise. De feito, como 'propósito' de aninovo, buscará polo menos ''manter'' e, se cabe, ata ''superar'' as devanditas cifras.
O protocolo a seguir en cada visita ''amóldase sempre ao perfil dos visitantes''. Con todo, hai un ''patrón que rexe'' en todos os casos, a modo de esquema base: comézase con ''explicacións previas a cargo de educadores medioambientais'', séguese por un ''percorrido guiado'' e remátase, á fin, cun ''coloquio''. As actividades complementarias posteriores á primeira visita informativa, xa que logo, varían segundo os casos.
Unha visita ás instalacións da xestora de residuos pode concertarse a través de reserva telefónica, contactando co seu Departamento de Comunicación, ou ben cubrindo un formulario en liña a disposición dos internautas.
