O satírico Partido Froilanista conmemorou este martes un dos momentos máis coñecidos da vida de Felipe Juan Froilán, fillo maior de Elena de Borbón e Jaime de Marichalar. Trátase do accidente de caza que sufriu o sobriño do Rei hai seis anos, cando tivo que ser intervido tras un disparo nun pé.
"Hoxe cumpren-se 6 anos do bautismo da Súa Alteza Real con armas de fogo. Parabéns Maxestade!", escribiu o Partido Froilanista na súa páxina de Facebook. A mensaxe ía acompañada dunha infografía explicativa de como ocorreu o suceso, moi sonado por aquel entón.
O colectivo, nado en 2014 —coincidindo co anuncio da abdicación do rei Juan Carlos—, reclama o trono de Galicia para o fillo da duquesa de Lugo como "Froilán III da Galiza e I de Begonte".
