domingo. 08.12.2019 |
El tiempo
domingo. 08.12.2019
El tiempo

Alumnos de Becerreá e Lugo álzanse cos primeiros premios de oratoria no certame Parlamento Xove

Alumnos do IES de Becerreá, co premio de oratoria. PEPE FERRÍN
Alumnos do IES de Becerreá, co premio de oratoria. PEPE FERRÍN

No certame organizado pola Consellería de Política Social chegaron a participar 1.547 estudantes galegos

Alumnos do IES de Becerreá e do Colexio Plurilingüe San José de Lugo alzáronse co primeiro premio na categoría de Oratoria no certame Parlamento Xove 2018, organizado pola Consellería de Política Social, e no que chegaron a participar 1.547 estudantes galegos. Os gañadores déronse a coñecer na mañá deste sábado nun acto celebrado no Parlamento no que participaron os 16 equipos finalistas procedentes de 14 centros educativos de Galicia e dos que saíron tanto os vencedores individuais como os colectivos que, neste último caso, recibiron un cheque de 5.000 euros para a realización dunha viaxe.

Alumnos do Colexio Plurilingüe San Xosé de Lugo, co premio do Parlamento Xove. PEPE FERRÍNOs vencedores da categoría Eso terán ademais a oportunidade de participar no certame de oratoria a nivel nacional que se celebrará no Senado, co patrocinio da Cámara galega e nunha competición estatal organizada no seo da Conferencia de Presidentes de Parlamentos Autonómicos (Coprepa).

O vicepresidente primeiro do Parlamento de Galicia, Diego Calvo, e o conselleiro de Política Social, José Manuel Rey Varela, presidiron o acto do Parlamento galego que puxo fin a un certame no que os mozos tiveron que debater sobre educación ambiental, cos incendios como pano de fondo, o cambio climático e os posibles beneficios académicos ou laborais dun ano sabático.

A iniciativa enmárcase na liña actual de "apertura do Parlamento á sociedade" e, neste caso, aos estudantes, e ao impulso a medidas que lles permitan "aprender valores, convivencia, respecto ao adversario e adestramento en habilidades dialécticas", destacou Diego Calvo.

Premiados no Parlamento Xove. PEPE FERRÍNO vicepresidente primeiro do Parlamento puxo en valor os temas escollidos para o debate, como a educación ambiental nos centros educativos, abundando en que "é evidente que o monte non arde só senón que alguén lle prende lume", e que "resulta ineludible unha actitude vixiante fronte aos delincuentes que atacan o monte, sempre á beira dun rexeitamento social absoluto".

O elevado nivel dos estudantes nesta novena edición de Parlamento Xove foi aplaudido por Rey Varela, que agradeceu a participación nunha iniciativa que imprime valores, pluralismo e capacidade de argumentar, e que se dirixe a un dos "maiores activos" cos que conta Galicia, como é a mocidade.

En Parlamento Xove, debátese por sorteo a postura que cada equipo debe defender e argumentar, a favor ou en contra, co que se contribúe ao desenvolvemento da competencia lingüística, matemática, no tratamento de información, e competencia dixital ou cultural, entre outros aspectos.

VENCEDORES. O Colexio Maristas Inmaculada de Lugo resultou subcampión na categoría Eso de Parlamento Xove e o Colexio SEK-Atlántico de Poio, subcampión en bacharelato. En categorías individuais, en Eso, venceron Almudena Mesejo Gondar, de Vilagarcía; Yago José Cabrera Díaz, de Lugo; Paula Parente Castedo, de Lugo, e Manuel Kevin Campos Pérez, de Pontevedra. En ESO, os premiados foron Saúl Corredoira, de Lugo; Silvia López Soto, de Becerreá; Xoel Rodríguez Pou, de Becerreá, Elena Bengoa, de La Salle e Sabrina Pérez López, de Monforte.

BECERREÁ, VENCEDORA POR CUARTO ANO. Foi a cuarta vez que o Instituto de Becerreá resulta vencedor do certame, en categoría de bacharelato, o que sitúa aos seus estudantes como os mellores en oratoria de Galicia, tamén con gañadores en categoría individual, un "orgullo" para un dos seus profesores, Xulio Teixeiro, que vinculou o éxito ao "esforzo, traballo e dedicación" dun centro con bastante "tradición" no estudo da oratoria.

"A verdade é que a oratoria axuda moitísimo a desenvolverte en moitos ámbitos porque basicamente vai seguir na túa vida diaria, tanto para argumentar calquera cousa como para desenvolver a túa capacidade de expresarte verbalmente en moitos ámbitos", explicou Silvia López Soto, estudante do IES de Becerreá. Unha oratoria que agora, aseguran, terán que utilizar para decidir o lugar da viaxe ao que destinarán os 5.000 euros do premio e que, de momento, aínda está pendente de debate.

Alumnos de Becerreá e Lugo álzanse cos primeiros premios de...
Comentarios