O Sarria achégase ao Ría de Ribadeo ao gañarlle na casa

Co liderado xa decidido na masculina, os focos puxéronse no encontro entre o Sarria e o Ría de Ribadeo, que acabaron levándose os amarelos por só dous puntos. Na feminina, o Ensino pasoulle por riba ao Burela na clasificación.

Consulta as clasificacións aquí

Masculina

O Hierros Ferreiro mantense invicto, pero esta xornada custoulle levarse a vitoria contra o Cidade de Lugo. O duelo comezou con baixa anotación, pero no segundo cuarto os de Rubén Engroba corrixiron erros e foron capaces de meter máis puntos que os rivais. No terceiro cuarto o Hierros non saíu nada ben, mentres que o Cidade pechouse en defensa e conseguiu levarse o parcial. O último cuarto foi un intercambio de cestas constante e o duelo decantouse a favor dos visitantes grazas ao acerto nos tiros libres.

No segundo posto segue o Ría de Ribadeo, pero o Sarria achegouse a un punto na clasificación despois de vencerlles na casa. Coma o partido de ida, foi un duelo moi intenso e emocionante. Os locais estiveron moi acertados no tiro exterior, anotando 13 triplas que llo puxeron complicado aos da Mariña. A falla de catro minutos para o final o Ribadeo perdía de 10 puntos, pero foron capaces de poñerse un punto por riba. Nos derradeiros intres, o Sarria volveu apoderarse do marcador e rematou vencendo por 73-31.

O Estudiantes empata a 19 puntos cos amarelos. Esta fin de semana gañou coma visitante ao Basket Ferrol. Dende o inicio os celestes mandaron no taboleiro, cun resultado ao descanso de 17-27. A saída tralo intermedio non foi a mellor, e o parcial do terceiro período caeu do lado dos locais. Aínda así o Estudiantes adminsitrou a vantaxe sen problema ata levarse o triunfo por 43-52. 

CIDADE DE LUGO 62 - 69 HIERROS FERREIRO

SARRIA 73 - 71 RIBADEO

BASKET FERROL 43 - 52 ESTUDIANTES

Feminina

Na feminina, o Ensino púxose por diante do Burela na clasificación. As laranxas seguen nunha xeira de fochancas e caeron na casa contra o Culleredo. Faltoulles intensidade defensiva, permitiron que as rivais circularan o balón con facilidade e pecaron de individualidades. Estes erros fixeron que, malia ter unha boa reacción no segundo tempo, quedaran con só un punto.

Pola contra o Ensino acumula bos resultados e esta semana venceu ao Artai. As de Lugo non fixeron unha gran saída á pista, pero co paso dos minutos foron crecendo ata poñerse por diante na segunda parte e pechar o partido cun derradeiro parcial de 24-10.

Na Copa Premium o Estudiantes e o Cidade de Lugo adiaron o seu derbi desta semana, que xogarán o vindeiro mes de marzo. Polo momento, o Cidade ocupa o terceiro posto da clasificación, seguido do Estudiantes, cuarto.

BURELA 61 - 63 CULLEREDO

ENSINO LUGO 60 - 41 ARTAI