O igualado derbi celebrado na Mariña resolveuse cunha vitoria do Burela por só dous puntos

O derbi lucense feminino do grupo que loita polo ascenso caeu do lado do Burela. Na Copa Premium o Estudiantes gañou e o Cidade perdeu na casa. En canto aos conxuntos da masculina, tiveron descanso esta fin de semana.

Consulta as clasificacións aquí

Feminina

Despois dunha mala xeira, o Burela volveu ser o equipo competitivo que comezou a temporada, e leváronse un derbi moi competido contra o Ensino. As laranxas conseguiron irse por riba ao descanso grazas á súa boa actitude defensiva e a conseguir pechar o rebote contra un rival de maior altura. A zona proposta polas ensinistas freou bastante ao conxunto mariñao, que perdeu o parcial do terceiro cuarto. A falta de 14 segundos o Ensino tiña a posesión para darlle a volta ao partido, pero Henar conseguiu roubarlle o balón a Noa e esgotaron a posesión para conseguir levarse o triunfo por 54-52. O triunfo volveunas a colocar no segundo posto da clasificación, un  número por riba do Ensino.

Na Copa Premium, o Estudiantes superou ao Esclavas a domicilio. As celestes non saíron ben ao partido, pero son superiores e tiveron a tranquilidade para ir crecendo co paso dos minutos. Empezaron a xogar mellor a partir do descanso, os roubos nos primeiros pases fixeron que puideran correr con facilidade e foran aumentando a vantaxe ata o 34-56 definitivo. No caso do Cidade de Lugo, que ocupa a terceira posición do podio, foi superada esta xornada polo Arteixo, sexto. As lucenses deixaron escapar os dous puntos por tan so tres de diferenza no marcador. Esta semana o Estudiantes e o Cidade de Lugo celebraran o seu derbi pendente da pasada xornada número nove.

BURELA 54 - 52 ENSINO LUGO

ESCLAVAS 34 - 56 ESTUDIANTES

CIDADE DE LUGO 43 - 46 ARTEIXO

Masculina

Os conxuntos da masculina descansaron a falta de dúas xornadas para rematar a primeira fase da competición. O Hierros Ferreiro, que xa certificou o liderado, recibirá en Lugo ao Costa Ártabra. Tamén na capital da provincia enfrontaranse o Estudiantes e o Sarria, partido decisivo xa que empatan a 19 puntos. O Ría de Ribadeo, que segue coa mira no segundo posto, actuará coma local ante o Cidade de Lugo, quinto clasificado.