A Consellería de Infraestruturas acometeu este martes o formigonado do taboleiro da nova ponte de Valdriz, na Pobra de San Xiao (Láncara), traballos que foron supervisados polo delegado da Xunta en Lugo, Javier Arias.
A empresa Ovisa é a adxudicataria das obras nesta ponte da estrada autonómica LU-621, que gañará catro metros de anchura, pasando dos seis actuais a dez, dos cales sete corresponden á nova calzada.
Trátase da parte máis complexa dunha actuación que inclúe tamén a construción dunha rotonda de entrada á urbanización de Valdriz, a rectificación do trazado da estrada no acceso a este viaduto e a creación dun paseo de 460 metros de lonxitude pola marxe esquerda da vía, dende o último treito de beirarrúa da Pobra ata a nova glorieta, todo iso cun investimento de máis de 600.000 euros.
A ampliación desta ponte, un dos puntos negros da LU-621, realízase ao longo de 500 metros e precisa da substitución de parte da terra da bóveda por cemento, así como a instalación de 513 metros cadrados de prelosa, armadura, ferro e formigón.
As obras avanzan a moi bo ritmo, de xeito e que a explanación xa está rematada e a empresa adxudicataria confía en poder finalizar antes do prazo previsto, fixado para finais de agosto.
Para executar estes traballos, houbo que facer microvoaduras, controladas con sismógrafos para non prexudicar a liña eléctrica situada na contorna. Tamén foi preciso construír un muro escollera na ponte e escavar máis de 15.000 metros cúbicos, o que dá unha idea da envergadura da actuación, indicou a Xunta.
Debido a estas obras, a ponte permanece cortada dende o día 6 de abril e o tráfico quedou desviado por Bande e Muro.
O corte afecta tamén a dúas rutas de transporte escolar que prestan servizo ao colexio público Ramón Piñeiro da Pobra e que manteñen as mesmas paradas, cun tempo de viaxe incrementado entre 5 e 15 minutos.