O obradoiro de emprego ‘Camiño de Santiago II’, concedido pola Xunta de Galicia ao Concello de Sarria, comezou as obras de mellora do pavimento nos núcleos de Aguiada e Perros, ambos na parroquia de Calvor, por onde transcorre a ruta xacobea.
Vinte alumnos-traballadores iniciaron a pasada semana os preparativos previos á execución destas labores, supervisadas por dous monitores, ao tempo que reciben formación en pavimentos de albanelería e urbanización, unhas clases teóricas que se imparten tanto no antigo centro de saúde como na aula Cemit.
Segundo explica o director do obradoiro, Antonio Taboada, a actuación consiste principalmente en substituír o formigón por lousa en dous treitos do Camiño Francés ao seu paso por estes núcleos, seguindo cunha mellora que xa iniciara o anterior taller de emprego na vila de Sarria, onde, entre outras obras, acondicionou en lousa un paso para peregrinos na baixada dende o cemiterio municipal cara á Ponte da Áspera.
No caso de Perros, todo o treito seleccionado irá en lousa mentres que na Aguiada combinarase este material con formigón lavado.
Trátase de recuperar pavimentos máis tradicionais, previa autorización da dirección xeral de Patrimonio. Ademais, e segundo apunta o director, as obras terán a supervisión dun arqueólogo ao afectarlle ao Camiño Francés, tal e como determinou este departamento autonómico.
O obradoiro, financiado pola Consellería de Emprego e Igualdade con 347.000 euros, terá unha duración de nove meses.
Os alumnos divídense en dous grupos que se reparten entre Aguiada e Perros e, unha vez rematado este taller, obterán certificados de profesionalidade nas especialidades que cursaron.
