miércoles. 24.07.2019 |
El tiempo
miércoles. 24.07.2019
El tiempo

A semente dun cura todoterreo

Coro Interparroquial do sacerdote Julio Fernández Doval de Sarria. EP
Coro Interparroquial do sacerdote Julio Fernández Doval de Sarria. EP

Julio Fernández Doval leva 22 igrexas de Sarria, Paradela, O Incio e Bóveda, onde puxo en marcha un coro que vai cumprir dez anos

NOS SEUS 35 anos de sacerdocio, Julio Fernández Doval tivo que cambiar de coche dez veces. O último ten só un ano e o contaquilómetros marca xa 45.000. "E sen saír de aquí", precisa o crego, que un día normal pode facer "tranquilamente cento e pico quilómetros". A razón de tanto percorrido é atender as 22 localidades que administra, repartidas entre os concellos de Sarria, Paradela, O Incio e Bóveda, o que require non só de habilidade ao volante senón tamén dunha organización milimétrica.

"Tes que ter todo moi programado", asegura o párroco, coñecido por unha puntualidade británica e por ir sempre acompañado dunha axenda, indispensable para facer cadrar tan alto número de compromisos relixiosos. Na súa rutina non é estraño velo oficiar ata tres cerimonias nunha mesma tarde, e en igrexas que distan entre si. Nestes casos tira de experiencia. "Para min as distancias son relativas. Sei moitos atallos. O GPS non o traballo. Primero experimento, exploro a situación e vou directamente", explica entre risos.

Aos seus 65 anos, Julio Fernández Doval está á fronte dos templos de Belante, Biville, A Pinza, Vilamaior, Nespereira, Chorente, Froián, Loureiro, Santo André de Paradela e Oural (no concello de Sarria); Castro de Rei, Andreade, Vilaragunte e Barán (no municipio de Paradela); Pacios, Noceda, Covela, Rubián de Cima e A Cervela, pertencentes ao Incio; e San Fiz de Rubián, Santiago de Rubián e Divino Ecce Homo en Bóveda, o que o converte nun dos cregos con más parroquias ao seu cargo.

Para poder atendelas todas estableceu dous centros de referencia: un na capela do Ecce Homo de Rubián e outro na igrexa de San Xosé Obreiro de Oural, nas que oficia misa todos os domingos. Foi neste último templo onde puxo a semente, hai case unha década, dunha iniciativa que agromou con éxito. Afeccionado dende sempre á música -cantou na coral de Samos-, Julio Fernández promoveu a creación dun coro entre os fregueses das distintas parroquias co obxectivo de animar as misas dominicais e incentivar a participación veciñal. "Quería ter algo que axudara a darlle vida ás celebracións", comenta. Foi así como naceu, no Nadal do 2009, o Coro Interparroquial, dirixido por Sandra López e formado por once mulleres e sete homes, con idades de entre 25 e 70 anos, que se reúnen todos o martes para ensaiar.

"Fano dende o desprendemento e a xenerosidade total", afirma o cura, agradecido pola vontade altruísta deste grupo de persoas, que son "o eixo dinamizador". "Eu sempre digo que se o facemos ben, mellor, pero se algún día non sae tan ben, non pasa nada, porque o importante é o acompañamento, e mentres haxa xente colaboradora, hai vida no lugar", asegura.

O Coro Interparroquial, aberto a todos os fregueses de Julio Fernández, realiza máis de 70 actuacións ao ano, todas gratuítas e con moi boa acollida. Ademais da misa dos domingos en Oural, actúa nas festas de cada parroquia -cun repertorio relixioso, pero adaptado a cada situación e ao tempo litúrxico- e organiza festas especiais por Reis ou polo Día da Nai.

"Ten que haber algo para que as celebracións non sexan monótonas. A música dá alegría e é unha riqueza ter algo participativo", apunta o cura, quen tamén implantou un estilo propio na catequese da confirmación. Así, os rapaces realizan esta preparación por correo electrónico con material seleccionado polo párroco, que recorre a internet nun intento de facela "un pouco máis atractiva".

Con tanta actividade e trafego, a palabra xubilación non entra no vocabulario deste crego todoterreo. "Iso vén cando marca a providencia ou a saúde", conclúe.

A semente dun cura todoterreo
Comentarios