Cinco días despois de que Pomba trouxera ao mundo catro becerros, na Casa de Abella de Andreade (Paradela) seguen abraiados coa proeza desta rubia galega.
Pero non só eles. Tamén o veterinario e moitos veciños da parroquia que se achegaron ata a explotación de Amadeo Pallares González para coñecer os pormenores de tan "excepcional" parto.
Entre as persoas máis entusiasmadas coa "sorpresa" que gardaba Pomba está a neta do gandeiro, Carmela Pallares Belón, que con seis anos xa ten claro que de maior será "veterinaria, cantante, bailarina, peluquera y cocinera".
Amante dos animais, Carmela relata con moita soltura o que aconteceu na explotación de seu avó o pasado venres. "El caso es que la vaca estaba embarazada. Mi abuelo decía que tenía dos y resulta que tenía otros dos más", explica a nena, que dende o primeiro momento se apuntou para axudar no coidado dos catro becerros dándolles biberón.
"É case, case, como ó que lle toca a lotaría, porque xogas toda a vida e non se dan casos deses"
A ela se deben os nomes cos que foron bautizados os xatos, "dos chicas y dos chicos". "Uno se llama Luna, otro Ricitos de Oro, otro Brais y otro Amador", este último en recordo da anécdota que supuxo para a familia que na primeira noticia sobre este parto cuádruplo seu avó aparecese identificado por erro como Amador.
Segundo conta o gandeiro, Pomba é unha vaca de raza rubia galega de sete anos de idade que foi criada na propia explotación e que nunca trouxera máis dunha cría por parto. Amadeo Pallares xa sospeitaba que nesta ocasión, tamén con inseminación artificial, ía ser distinto, pero nunca imaxinou que a res protagonizaría tal fazaña. "Eu xa vía que tiña moita barriga, estaba case seguro de que traia dous pero catro parecíame unha cousa imposible. Non o contaba nin soñando", confesa.
De feito, tras sacar tres becerreos coa axuda do veterinario do Páramo Javier López e duns veciños, miraron se había un cuarto "case de broma" porque, realmente, ninguén o esperaba. "É case, case, como ó que lle toca a lotaría, porque xogas toda a vida e non se dan casos deses", exemplifica.
Este experto gandeiro, natural de Vilamaior e con 35 anos de experiencia, amósase moi satisfeito co desenvolvemento do parto porque "saíu todo moi ben e non tiveron problema ningún nin a vaca nin os becerros". Iso si, nestes días precisan coidados especiais para sacalos adiante. Houbo que dar biberón a todos, aínda que agora só queda con estas tomas o máis pequeno mentres que os outros tres "xa maman na vaca".
O que si ten decidido este veciño de Andreade é que a Pomba non se vende
O futuro dos buchiños está por definir. Tras moitos anos traballando, Amadeo quedou con 15 vacas e calcula que non tardará moito en deixar a explotación polo que descarta crialos, se ben un sobriño seu está interesado en dous deles para a súa gandaría. O que si ten decidido este veciño de Andreade é que a Pomba non se vende. E iso que xa houbo algunha proposta. Pero, unha vaca tan dócil e con tal mérito, "non marcha da casa mentres poidamos", afirma.