miércoles. 02.12.2020 |
El tiempo
miércoles. 02.12.2020
El tiempo

O obradoiro de emprego realiza obras de limpeza e conservación da Escalinata

Traballos na Escalinata pola que acceden ao casco vello os peregrinos. EP
Traballos na Escalinata pola que acceden ao casco vello os peregrinos. EP
Este punto singular do Camiño de Santiago é o lugar polo que acceden os peregrinos ao casco antigo

O obradoiro de emprego de Sarria realiza traballos de limpeza e mantemento na Escalinata Maior, un punto singular do Camiño de Santiago ao seu paso pola vila ao ser o lugar polo que acceden os peregrinos ao casco antigo.

Estas obras de conservación comezaron a pasada semana e prolongaranse durante varios días co obxectivo de acondicionar a zona e limpar as pedras dentro dos parámetros que marca Patrimonio.

O obradoiro de emprego, formado por 20 alumnos, executa melloras en diversos puntos do Camiño de Santiago na vila. Parte da súa intervención centrouse no campo da feira, onde reparou muros, actuou sobre os depósitos de auga e sobre a escaleira que comunica cos pendellos.

Os alumnos-traballadores tamén se encargaron de habilitar unha senda para peregrinos paralela ao cemiterio municipal, de xeito que queda diferenciada a parte dedicada ao tráfico rodado e a dos peóns. O labor que desenvolveron nesta contorna permitiu tamén descubrir parte dun antigo viacrucis que estaba tapado.

Os traballos na Escalinata mereceron os parabéns da Asociación de Amigos do Camiño de Santiago na Comarca de Sarria, cuxo presidente, Jorge López, considerou que se trata dunha intervención necesaria nun punto moi simbólico da ruta xacobea na vila.

López indicou que esta zona sufría abandono dende hai anos e reclamou continuidade para esta mellora con labores de mantemento de xeito frecuente.

O obradoiro de emprego realiza obras de limpeza e conservación da...
Comentarios