lunes. 14.10.2019 |
El tiempo
lunes. 14.10.2019
El tiempo

A feira de anticuarios terá profesionais de Francia nas súas vodas de prata

Visitantes nun dos expositores da feira de anticuarios de Sarria. VILA
Visitantes nun dos expositores da feira de anticuarios de Sarria. VILA

O evento vén de completar dous días de celebración e pensa xa na vindeira edición, na que cumprirá 25 anos

A Feira de San Lázaro de Antigüidades e Restauración de Sarria clausurouse este domingo tras dous días de celebración e pensando xa na vindeira edición, na que se cumprirán as súas vodas de prata e para a cal se espera a participación de profesionais deste sector con orixe en Francia.

Segundo explicou a concelleira de turismo, Marisa López, este ano houbo contactos cuns anticuarios franceses que amosaron interese por asistir á seguinte edición, na que se cumpirán 25 anos deste evento. Con esta incorporación, a feira de Sarria farase máis internacional, xa que se sumarán aos profesionais de Portugal que levan varios anos participando. 

A concelleira fixo un balance "positivo" destes dous días de mercado, celebrado o sábado e o domingo na Rúa do Porvir e en Marqués de Ugena, tanto nas carpas instaladas polo Concello como nas propias tendas dos anticuarios da vila. "A pesar das inclemencias meteorolóxicas o balance é positivo. A xente que vén, volve. De feito, os anticuarios que viñeron novos este ano xa amosaron interese por repetir", asegurou. 

Marisa López valorou tamén a participación do público, chegado dende numerosos puntos de Galicia como "Ferrol, A Coruña, Santiago, Ordes ou Ribadeo", así como de Asturias. "A xente que veu, veu comprar", destacou. 

Sinalou tamén que, de cara á vindeira edición, desde o Concello de Sarria intentarase potenciar a Feira de San Lázaro con algún tipo de atractivo engadido para celebrar as vodas de prata. 

28 EXPOSITORES. Este ano foi un dos máis numerosos en canto a expositores, contabilizándose un total de 28, dos cales 24 eran anticuarios e coleccionistas. Ademais, o público puido gozar dun café-bar ambientado nos anos 20 e ideado pola diseñadora María Beltrán con pezas dos anticuarios de Sarria. Este expositor completouse con música en directo e degustación de produtos locais. 

Tamén se puido ver unha exhibición de talla en madeira de Sarricanta, unha mostra de olería da asociación Canaveira e variadas exposicións na casa da cultura. 

A agrupación tradicional Peleriños amenizou a xornada do domingo, cunha actuación que se trasladou á casa da cultura debido ao mal tempo. Do mesmo xeito, a feira ofreceu postos de comida e actividades para os nenos.

A feira de anticuarios terá profesionais de Francia nas súas vodas...
Comentarios