Defínase en poucas palabras.
Dame un pouco de reparo. Diría de forte compromiso, ideoloxía, traballador e conciliador.
Resultou ser a xestión municipal como esperaba?
Non. Hai que aprender a adaptarse aos ritmos da administración, no privado é máis inmediato.
Volvería pactar con Pilar López?
Presentámonos para ter nós a alcaldía.
Pero de ser necesarios pactos?
Pactaremos con calquera para formar un goberno de esquerdas e cos pés na terra.
Cal é a súa quiniela electoral?
Creo que nós imos ter unha subida moi importante e imos ser a forza de referencia na esquerda.
Emprega a miúdo redes sociais?
Non moito.
A que ou a quen lle poría un 'gústame'?
A Mónica López (a súa compañeira de goberno do BNG).
E unha cara de enfado?
Seguro, ao PP.
Un sorriso?
Un sorriso moi grande ao BNG, creo que é unha formación necesaria para este país.
Cre que a política é como unha proba de resistencia?
Si, hai momentos duros, ás veces no político e outras no persoal.
Como van as fochancas no rural?
A menos. Non podemos dicir que estea todo perfecto pero traballamos bastante para solucionalo.
E a residencia de maiores?
Foi todo un reto dirixila e creo que se mellorou moito na xestión.
Díganos unha proposta para Ponte Ribeira.
Xa dunha vez ten que deixar de rirse de Sarria a CHMS, axudarnos de verdade e abrila.
Pero agora é o Concello quen ten licitada a obra...
A CHMS pode mollarse en calquera momento e axudar economicamente e en calquera problema.
Cando se poderá nadar na piscina cuberta de Sarria?
Case inminente, non antes das eleccións, pero dentro deste ano.
A quen admira?
Os libros de Castelao foron os que me levaron á política e iso sempre é unha estrela que está guiando.
Cal foi a última película que viu no cine?
Gústame todo tipo de cine. A última foi Vengadores Endgame.
Como ciclista, vese no pelotón ou escapado?
Véxome coma un gregario.
De quen?
Do pobo.
Unha meta para Sarria?
Téñoo clarísimo: ordenar o urbanismo, deixar o pleistoceno urbanístico e traelo a esta era.
O candidato acostuma a levar camisetas de rugby e ten un referente na selección de Irlanda. "Encántame este deporte polos seus valores", di.
Chapas con mensaxe
No seu vestiario soe incluír chapas con mensaxe, alusivas a Rosalía, Castelao ou ao BNG . É habitual que acabe regalándoas a quen lle gusten.
Calzado deportivo
Efrén Castro usa no seu día a día calzado deportivo. En xeral, prefire a roupa "cómoda" e decántase polos zapatos en contadas ocasións.