O Consello da Xunta aprobou este xoves un decreto de expropiacións para converter en autovía o corredor de Monforte, entre A Pobra de San Xiao (Láncara) e o enlace de Sarria centro.
Son once kilómetros de tramo e o investimento da obra ascende a 24,5 millóns de euros, expropiacións incluidas. O presidente da Xunta, Alberto Núñez Feijóo, indicou que neste tramo é no que hai máis dificultades para adiantar, motivo polo que se decidiu "priorizar" este investimento.
As fincas que se van expropiar son 53, cun importe de taxación de expropiación dun cuarto de millón de euros. A previsión é que as obras arrinquen nos primeiros meses de 2020. O obxectivo é "conseguir un menor tempo de conexión e unha maior seguridade". Terá tres enlaces: A Pobra de San Xiao, Sarria norte e Sarria centro.
Feijóo cifrou en 135 millóns o investimento no corredor desde o 2009 e lembrou que entre os compromisos da lexislatura está a conversión en autovía. Quedaría unha segunda fase respecto á que a Xunta comezou coa redacción do proxecto.
