jueves. 28.05.2020 |
El tiempo
jueves. 28.05.2020
El tiempo

Tiam GZ: unha banda de Chantada que chega con hip hop "feito na casa"

Os catro integrantes de Tiam GZ.
Os catro integrantes de Tiam GZ.
Catro mozos forman un grupo que, malia levar só dous anos, xa conta con sete temas gravados e elaborados con recursos propios

Creativos, novos e reivindicativos son tres cualidades que poderían resumir a esencia de Tiam GZ. No ano 2018 catro rapaces da comarca de Chantada amantes da música rap comezaron a xuntarse para facer letras. Daquela experiencia xurdiu unha "mixtape" que subiron ás plataformas dixitais baixo o nome de 'Cantigas'. Os concertos non tardaron en chegar.

Brais Vázquez (Torozas), Iago Suárez (Iagueiro), Álex Varela (Alessov) e Matías Zelayarán (Mr. Mati) son os nomes dos catro rapaces que conforman Tiam GZ. Como eles mesmos din, o seu é un rap "feito na casa" cun micro propio e despois dun proceso de elaboración que comeza coa melodía, que crea Matías.

A partir dela xorde o tema e cada membro da banda prepara a súa parte da letra, que normalmente transmite as súas ideas persoais. "Non temos medo a dicir que a maior parte das cancións son políticas e sociais. Están dentro dun galeguismo combativo», comenta Iago Suárez, quen engade que no seu repertorio hai sitio tamén para «temas máis festivos e ata algún romántico".

Coa axuda dunhas amigas, Tiam GZ gravou xa o seu primeiro videoclip -Chámase 'Flows da nada'- e o pasado verán foi o da súa consolidación entre o público, especialmente o máis novo. "Demos uns dez ou doce concertos. Case todos en Chantada, pero tamén en sitios próximos coma Taboada ou Pantón", di Iago.

Como é lóxico, o contacto estes días quedou relegado ás videochamadas. Durante unha tempada Tiam GZ non poderán facer o que máis lles gusta, que é xuntarse para compoñer e ensaiar. "Ese instante, xunto cos momentos previos aos concertos, é único polo ambiente que se xera", comentan a través da aplicación Skype, que nestes días difíciles permite manter certa vida social. Iso si, non ocultan que ensaiar a distancia "faise difícil".

Malia as complicacións, Tiam GZ pensa no futuro e os seus integrantes deseñan novos temas para engadir aos sete que xa teñen publicados. Segundo afirman, estas primeiras sete cancións tiveron unha boa acollida entre os seus seguidores. A maior parte do seu rap creado na casa pódese escoitar na coñecida plataforma audiovisual de internet YouTube.

A música non para en días incertos 
Tiam GZ, subliñan os seus integrantes, crean e compoñen na casa. A proximidade dos concertos fai que se teñan que reunir para ensaiar. Agora, en tempos de confinamento, aproveitan para elaborar novas cancións e, segundo avanzan, é posible que cando a normalidade volva haxa algún novo tema preparado. Non serán o único grupo que teña sorpresas que amosar ao público cando a corentena chegue á súa fin.
Estrea en Youtube
O grupo Gancho Sanches, unha banda de rock alternativo que ten o seu particular local de ensaio no barrio de Zaquín (Chantada), presentou onte unha nova canción, titulada ‘Salto ao baleiro’. A banda fórmana catro rapaces. Cada un deles gravou na súa casa a parte deste novo tema correspondente ao seu instrumento. Logo xuntaron, ben mesturados, os catro fragmentos nun só vídeo e subírono a internet, onde xa se pode escoitar.

Tiam GZ: unha banda de Chantada que chega con hip hop "feito na casa"
Comentarios