Martes. 21.08.2018 |
El tiempo
Martes. 21.08.2018
El tiempo

O mel polo que tolean os osos está en Quiroga

Un apicultor realza o seu produto ante os turistas. TOÑO PARGA
Un apicultor realza o seu produto ante os turistas. TOÑO PARGA

Sete apicultores venderon 2.000 quilos deste produto na mostra que serviu de apertura das festas

"Como non vai ser boa? Ao oso gustalle moito!". Ese era o argumento que un dos sete apicultores que acudiron á mostra do mel de Quiroga celebrada este venres na vila esgrimía a pé de posto para convencer un turista que lle daba voltas á compra de dous tarros deste exquisito produto.

O vendedor explicaba que nos últimos tres meses o oso asaltara ata catro veces as súas colmeas e que ás do veciño nin se achegara. "Por algo é", razonaba o apicultor. O turista finalmente cerraba o trato, non se sabe se convencido polo argumento do oso ou pola cara de felicidade que poñía a súa dona despois de catar un chisco de mel cun biscoito.

O caso é que o oso veu para quedar nas montañas do Courel e na feira a idea dun plantígrado asaltando as colmeas xa se instaurou coma estratexia de márketing. A iso chámaselle ir cos tempos.

O mel de castiñeiro vale un pouco para todo. De primeiras é o máis adecuado para tratar un arrefriado ou suavizar a gorxa

Na mostra quiroguesa saíron á venda uns 2.000 quilos de mel e outros derivados coma o polen ou a xelea real e a verdade é que aos apicultores no lles custou moito convencer ao consumidor.

A maioría da colleita xa se vende a clientes fixos que chegan á primeira hora da mañá polo recinto e levan abonda despensa para todo o inverno. Xa se sabe que hai que facerlle fronte aos catarros e untar as filloas da matanza.

Cando os habituais voltan á casa, entran en escea os turistas e visitantes máis despistados que pican aquí e acolá, un pouco en cada posto.

Os que se achegaron puideron atopar variedades máis habituais coma o mel milflores, no que se mezclan as variedades florais coas que traballan as abellas, ou o cotizado mel de castiñeiro, máis característico da montaña lucense e que ten propiedades case que milagreiras.

O mel de castiñeiro vale un pouco para todo. De primeiras é o máis adecuado para tratar un arrefriado ou suavizar a gorxa. Pero as súas características non rematan niso, tamén rexenera os tecidos do intestino e é un bo antiinflamatorio.

Os que onte se animaron a probalo xa curaron, e xa están listos para troulear nas festas de Quiroga que quedaron inauguradas coa mostra na que se destaca un dos produtos máis auténticos de toda a comarca.

O mel polo que tolean os osos está en Quiroga