miércoles. 04.08.2021 |
El tiempo
miércoles. 04.08.2021
El tiempo

''A Feira do Viño de Amandi será en agosto adaptada ao novo tempo''

Luis Fernández Guitián, diante da casa consistorial. TOÑO PARGA (alcalde de Sober)
Luis Fernández Guitián, diante da casa consistorial. TOÑO PARGA

Luis Fernández Guitián sabe que vive nun paraíso no cal a música, o viño e a arte son recursos fundamentais, polo que busca recoñecer a súa importancia a través da creación dun museo

Recuperar a Feira do Viño de Amandi é unha prioridade para Luis Fernández Guitían. Sabe que o motor económico do concello sufriu co peche da hostalería e quere axudar a adegueiros e viticultores a retomar o camiño.

Haberá Feira do Viño de Amandi?

Será os días 11 e 12 de agosto, coincidindo coa Feira da Rosca. Sober vive de e para o viño, é o principal recurso económico e hai que dinamizalo. Hai cerca de 40 bodegas amparadas pola denominación de orixe Ribeira Sacra e moitos viticultores que lles venden uva. No 2020 non se puido facer a feira pola pandemia, só houbo un evento simbólico para non deixar pasar a 40ª edición, pero este ano retomarémola.

Como será?

Falta perfilar cos colleiteiros, pero será na praza, con jaimas para os postos, control de aforo, ventilación e tempo de estancia limitado. Antes teremos o Mes do Amandi, con actividades diversas, algunha actuación musical... Non poderá ser unha feira tradicional, pero hai que adaptarse aos novos tempos e buscar formatos alternativos. O sector do viño necesita dinamización. Perdeu moito co peche da hostalería e a feira é un bo escaparate.

Vostede di que Sober vive do viño e as estatísticas confirman que se vive moito. Hai 14 centenarios.

Presumimos diso e os maiores sempre din que a súa lonxevidade se debe ao viño. Eu penso que é a vida tranquila do rural. En Sober vívese moi ben, a calidade de vida no campo non se pode pagar. Xa o sabiamos antes, pero coa pandemia fíxose máis patente e notouse no asentamento de poboación.

Medrou o censo?

Si, pero non só pola pandemia, xa viña de antes. No curso 2009-10 había 39 nenos no colexio e para o 2021-22 hai 74 matriculados. As 20 prazas da gardería están cubertas e, a pesar da lonxevidade dos veciños, a media de idade baixa porque medra a poboación nova.

Cal é o motivo?

Estamos a 10 minutos de Monforte e a 30 de Ourense. Temos un territorio fantástico e un tecido social que axuda a asentar poboación. Hai asociacións moi activas, unha biblioteca dinámica, escola de música, banda...

Sober é terra de música. Nos 50 chegou a haber tres bandas. Hoxe conservamos unha, con 150 anos de historia, que é o noso orgullo. Temos tamén escola de música, que lle serve de base. Sober é coñecido fóra pola banda.

''O sector do viño necesita dinamización. Perdeu moito co peche da hostalería e a feira é un bo escaparate'', apunta Fernández Guitián 

E polos canóns do Sil, pola cerámica de Gundivós... Levamos case dez anos na cúspide do turismo.

En Sober hai máis de 50 casas rurais e vivendas de uso turístico. Este tipo de actividade sen grandes concentracións de xente mantívose ben incluso coa pandemia. A parte lucense do canón do Sil está case toda en Sober e temos dez miradoiros para desfrutar desas paisaxes que acaban de recibir o distintivo Q de calidade. Hai arquitectura románica moi singular, un conxunto de pinturas manieristas moi interesante... En Sober o que sobra é arte. E aínda non falamos de Gundivós, cunha olería única, elaborada cun torno manual baixo, unha peza ancestral moi singular

Cantos oleiros hai en activo?

Hai dous.

E hai relevo?

Pode haber, aínda son novos. Esta olería sempre estivo ligada á función doméstica, a labranza, a matanza, o viño... O oficio perdeuse coa emigración e coa aparición do plástico e outros materiais que supliron as súas funcións. No 1981 celebrouse a primeira feira do viño e houbo dous oleiros que fixeron pezas para a ocasión. Desde entón traballouse pola recuperación.

Ten algo novo en mente?

Quero facer un centro de interpretación das terras de Amandi, un museo. Temos a música, a olería, o viño, a xeoloxía dos canóns do Sil, o románico... Gustaríame reunir todo iso nun único lugar.

E a curto prazo?

Haberá unha segunda escavación en Proendos. Na primeira apareceron elementos romanos dos séculos I e II. A lenda di que aí está enterrada a cidade de Proencia.

O verán é tempo de obras.

Estamos facendo un esforzo para ampliar a rede de auga e de saneamento. E temos un hándicap na rede viaria. En Sober hai 100 quilómetros de estradas da Deputación, en mal estado e con tramos impracticables. Se queremos dinamizar o rural, as comunicacións son imprescindibles. A Deputación ten abandonadas as estradas de Sober. É a eterna demanda.

Un alcalde con sentido do ritmo
Músico
Luis Fernández Guitián foi músico antes que alcalde e seguirao sendo cando algún día deixe o cargo. Foi profesor en varios conservatorios, dirixiu diversas formacións e puxo todo o seu empeño por manter activa a banda de Sober, que supera os 150 anos de historia. Foi director da banda e da escola de música e presume delas como se foran as súas fillas.
Clarinete
O seu clarinete é o seu mellor asesor. Di que o toca con frecuencia e que no tempo de confinamento lle serviu de desafogo. ''Tocaba a diario e era o mellor momento do día. Evadíame de todo o que estaba pasando'', lembra.
En familia
Luis Fernández Guitián pode desfrutar en familia desta afección, pois a súa muller tamén é música e as súas dúas fillas seguen os seus pasos como alumnas da escola soberina.

''A Feira do Viño de Amandi será en agosto adaptada ao novo tempo''
Comentarios