jueves. 04.06.2020 |
El tiempo
jueves. 04.06.2020
El tiempo

Chantada brinda ao ritmo do viño noutro éxito de público

Clientes nunha adega en Chantada. MIGUEL PIÑEIRO
Clientes nunha adega en Chantada. MIGUEL PIÑEIRO
Viña Garoña, Instinto Romano, Sabatelius Carballo e Neno da Ponte Canceliña gañaron a cata profesional de caldos

Había medo ao mal tempo, pero case sempre reinou o sol. Tampouco cundiu a preocupación polo coronavirus, que protagonizou non poucos comentarios e bromas. A edición número 38 da Feira do Viño de Chantada congregou numeroso público debaixo da carpa instalada na Praza de Galicia durante tres días de festa e exaltación vinícola.

Participaron 14 adegas. Todas levaron un agasallo coma agradecemento ao seu traballo mentres outros gozaban dos viños. A asociación galega de enólogos foi a encargada de seleccionar os de mellor calidade na cata oficial que a organización celebra cada ano.

Na categoría de brancos, o galardón máximo levouno Viña Garoña. Completaron o podio Calexotes Godello e Papeiros e Rabudos. A honra de ser o mellor tinto levouna Instinto Romano, caldo ao que seguiron Albarduxe e Sabatelius Mencía.

As 246 persoas que participaron no concurso popular de degustación decantáronse por Papeiros e Rabudos 2019

A cata oficial reservou dúas divisións máis, unha para os viños doutras añadas e a última consistía nun premio á mellor presentación. Na primeira destas categorías proclamouse gañador Sabatelius Carballo 2017, en segundo lugar saíu elixido Castrofiz Barrica 2017 e o podio completouno Cabo do Mundo Outro Lado 2018. Neno da Ponte Canceliña 2018 recibiu o mérito da mellor presentación da Feira do Viño.

O público asistente ao certame tiña a opción de participar na súa particular escolma. O gañador da cata popular -contou con 246 persoas- foi Papeiros e Rabudos 2019, seguido de Terra Bendaña 2019 e Marqués de Garoña 2018.

ACTIVIDADES. Foi unha Feira do Viño especial, con mencións ao 8-M, Día Internacional da Muller, e cunha actuación sorpresa que tivo lugar este domingo. A banda de gaitas de Chantada cumpre 30 anos de traxectoria e no seu aniversario subiu ao escenario para sorprender os espectadores cunha actuación onde non podía faltar a famosa muiñeira chantadesa.

Iso foi despois de que Ricardo González lera o pregón. Este empresario venezolano con orixes na Lagariza (parroquia de Nogueira) deixoulle a súa voz á Feira do Viño cunhas verbas nas que subliñou as súas orixes e enxalzou tanto o viño como a contorna.

Outra das novidades desta Feira do Viño atopábase no auditorio municipal. Alí se instalou un túnel do viño, para que os interesados nos caldos puidesen degustar tranquilamente cada referencia participante e logo ir directamente ás adegas mercar as súas preferidas. Os promotores amosáronse moi satisfeitos coa recepción que tivo esta iniciativa.

A xornada estivo marcada pola tranquilidade. Só houbo que lamentar a intervención da ambulancia do 061 para auxiliar onte a unha muller que sufriu un baixón de tensión. Quedou nun susto.

Chantada brinda ao ritmo do viño noutro éxito de público
Comentarios