O Estudiantes asegúrase o liderado da primeira fase coa vitoria sobre o Básquet Coruña

O Sarria e o Estudiantes conseguiron dúas vitorias na categoría masculina. En canto á feminina, as amarelas e o Burela xogaron fóra, pero só o equipo de Sarria volveron á casa cunha vitoria.

Consulta as clasificacións aquí

Masculina

O Estudiantes conseguiu certificar o primeiro posto do grupo norte a falla dunha xornada ao gañarlle ao Básquet Coruña. Os celestes, que poden acabar a primeira fase invictos se gañan tamén a xornada que vén, acumulan 18 puntos. O duelo desta fin de semana celebrouse na cidade herculina e conseguiron levarse o triunfo por 53-73.

O Sarria, que tamén se levou os dous puntos contra o BBCA, suma agora un total de 15 co que asegura o pase á segunda fase. Os amarelos impuxeron un alto ritmo dende o inicio, con rápidas transicións e dominio do rebote, que lle permitiu sentenciar un marcador de 69-19.

Feminina

Na competición feminina o Sarria mantén o segundo posto con 15 puntos. Esta xornada viviu un partido con altibaixos fronte ao Básquet Coruña. As amarelas non comezaron ben, estiveron moi desacertadas, pero no terceiro cuarto aproveitaron o baixo ritmo das locais para castigalas no marcador. Chegaron ao último cuarto igualadas e grazas a unha fantástica defensa leváronse o partido.

O Burela, pola contra, non conseguiu impoñerse ao Montrove. As de Oleiros ocupan o primeiro posto na clasificación e impuxeron a súa calidade para vencer ao conxunto laranxa.