O Estudiantes conseguiu o segundo triunfo na loita polo campionato

A segunda xornada deixou o mesmo balance na categoría masculina, mentres que na feminina o Sarria estreouse na vitoria e o Burela caeu.

Consulta as competicións aquí

Masculina    

O Estudiantes acumula dúas vitorias nesta nova fase, xa que esta semana gañoulle ao Obradoiro na casa. Os celestes impuxéronse cun marcador de 74-47 que os deixa no segundo posto da clasificación. No caso do Sarria, volveron saír derrotados. O Galogrín impúxose no Novo Pavillón do Chanto, nun partido de ti a ti que puido caer para calquera. Nos tres primeiros cuartos os amarelos foron claros dominadores en tódalas facetas do xogo, pero no último período os visitantes impuxéronse no rebote e as segundas opcións déronlles o partido. 

Feminina

Na categoría feminina, o Burela caeu contra o Montrove no grupo A1. No duelo celebrado na Mariña comezaron mellor as visitantes, levándose o marcador ao seu favor ao descanso. As laranxas repuxéronse na segunda metade e malia que se achegaron moito non conseguiron darlle a volta ao resultado. No caso do Sarria, no A2, gañoulle ao Compostela por 64-16 grazas á súa regularidade. As amarelas mantiveron unha liña de traballo forte durante todo o partido, xogando ordenadas e coas metas claras. Ás súas rivais seguíronlles o ritmo no primeiro cuarto, pero un parcial de 14-0 no segundo período deixounas sen opcións. Dende aí, o Sarria seguiu dominando e buscou ataques máis logos na segunda metade, buscando a participación de todas.