O Ensino agárrase ao podio tras vencer ao Compostela nun igualado partido

O Ensino afastou ao Compostela na masculina ao gañarlle en Santiago, mentres que na feminina tumbou ao Miralba Celta.

Consulta as clasificacións aquí

Masculina

O conxunto masculino do Ensino enfrontouse contra outro gran equipo da Primeira, o Compostela. O duelo estivo igualado con distancias non superiores a seis e sete puntos e cun constante intercambio de cestas entre ambos. Os lucenses non estiveron cómodos en ningún momento, pero a falta de tres minutos conseguiu pechar a súa defensa e situarse un punto por riba. Os continuos erros na liña de tiros libres dos dous conxuntos decidiron o encontro e caeu do lado dos vermellos.

O Estudiantes e o San Ciprián, pola contra, foron derrotados a domicilio. Os celestes perderon un partido importante contra o Compañía de María, no que sempre foron a remolque e  lles faltou intensidade. No caso dos da Mariña, o seu rival foi o Bosco Salesianos, que se impuxo por 85-63. O San Ciprián competiu ben ata que os rivais impuxeron unha defensa zonal que non souberon atacar. 

COMPOSTELA 76 - 77 ENSINO

COMPAÑÍA DE MARÍA 88 - 83 ESTUDIANTES

BOSCO SALESIANOS 85 - 63 SAN CIPRIÁN

Feminina

Na feminina a vitoria tamén caeu do lado do Ensino, e a esta sumouselle a do Sarria. As da capital provincial gañaron en Vigo ao Miralba Celta cun amplo marcador de 48-104. Malia a grande diferenza, ao Ensino custoulle sacar a diferenza no primeiro cuarto, ante un rival que se meteu no partido. No segundo cuarto a reacción defensiva do equipo fixo que conseguiran anotar moito máis e despois de irse ao descanso por riba controlaron a vantaxe ata o final. As amarelas, pola súa parte, foron superiores ao Arxil A, un rival moi intenso fisicamente. Grazas á intensidade defensiva o Sarria levouse o duelo ao seu terreo. A súa grande circulación de balón e o rebote nos dous aros foron a clave para conseguir a vitoria.

No caso do Estudiantes, rematou perdendo contra o PBB A nun enfrontamento competido. As celestes saíron ben ao parqué, pero faltoulles fluidez en ataque e, malia ter as primeiras vantaxes, non lograron distanciarse no marcador. No terceiro cuarto o Estudiantes tivo o seu mellor momento ofensivo, pero o Arxil aumentou a dureza defensiva e engancharonse ao partido, para acabar dominando por completo o rebote e levarse o partido no último minuto.

SARRIA 60 - 54 ARXIL A

MIRALBA CELTA 48 - 104 ENSINO

PBB A 70 - 67 ESTUDIANTES