O Ensino manda na feminina coa oitava vitoria do curso

Continúa a competición da Primeira júnior sen descanso. Na masculina, a décima xornada deixou vitorias do Ensino e o Estudiantes e, no caso das súas compañeiras, as ensinistas foron as únicas en saír á pista conseguindo un triunfo contra o Carmelitas.

(Artigo en ampliación)

Consulta as clasificacións aquí

Feminina

Oito vitorias en oito partidos leva o Ensino na feminina. Esta xornada o Estudiantes e o Sarria adiaron os seus encontros, co que soamente as vermellas saíron á pista. Fixérono en Lugo, recibindo ao Carmelitas Ourense no Seminario menor, marcándose un moi bo salto á pista. No segundo e terceiro cuarto, reduciuse o porcentaxe anotador das lucenses, pero seguiron mandando no marcador ata o derradeiro período, no que foron superadas polo Carmelitas, pero conseguiron a vitoria por 77-65.

ENSINO 77- 65 CARMELITAS

Masculina

Na masculina o Ensino e o Estudiantes seguen empatando a puntos na clasificación, despois das vitorias recollidas na décima xornada. Os vermellos conseguiron un triunfo importante contra o Basket Ferrol nun duelo ao que se presentou con moitas baixas. Malia só contar con oito xogadores os ensinistas impuxéronse ao conxunto ferrolán, malia que este intentou poñer en problemas aos lucenses con alternancias defensivas. A grande efectividade no tiro exterior do Ensino foi clave para sentenciar o partido tras unha segunda metade redonda que rematou co 49-80 definitivo. No caso do Estudiantes, superou ao Blanco Amor por 64-76 con máis problemas. Despois de unha primeira metade igualada, que rematou a favor dos celestes, os lucenses puideron matar o partido no terceiro período, pero non conseguiron afastarse no marcador debido á falla de concentración defensiva. Aínda así, controlaron a vitoria ata o final. Quen non está a ter tanta fortuna é o San Ciprián, que acumula sete derrotas trala caída contra o Compañía de María. Os da Mariña non conseguiron asentarse no partido en ningún momento, pero maquillaron o resultado cunha mellor segunda metade (84-54).

BASKET FERROL 49 - 80 ENSINO

COMPAÑÍA DE MARÍA 84 - 56 SAN CIPRIÁN

BLANCO AMOR 64 - 76 ESTUDIANTES