O Ensino adiántase á estrea da segunda fase con vitoria sobre o Estudiantes Pontevedra

A primeira xornada da segunda fase da Primeira infantil comezará a vindeira fin de semana, pero o Ensino adiantouse á estrea.

Consulta as clasificacións aquí

Masculina

Na competición masculina, xogan polo campionato o Estudiantes Lugo, no grupo A1 e o Burela, no grupo A2. Estrearanse xogando a domicilio contra o Básquet Coruña e o Basket Ferrol, respectivamente. O Ensino, que quedou fora dos postos altos, completa as filas do grupo B1 e adiantou o partido da primeira xornada.

O domingo enfrontouse a domicilio contra o Estudiantes Pontevedra, equipo campión galego o ano pasado na categoría mini, ao que conseguiu gañarlle por dous puntos. Os locais, con grande calidade técnica, conseguían irse moi fácil no un contra un e meteron en tódolos períodos ao redor de 25 puntos. Malia iso, o alto ritmo ensinista permitiulles irse ao descanso 51-64. Na segunda metade o equipo de Lugo tivo que facer varias rotacións, e o Estudiantes púxose por riba no último cuarto. Ao final, xogadas ensaiadas en ambos os equipos. Ao Ensino saíulle mellor, anotaron e defenderon ben nos últimos minutos e conseguiron sacar o partido.

ESTUDIANTES PONTEVEDRA 97 - 99 ENSINO LUGO

Feminina

Na feminina, ningún dos dous equipos lucenses loitará polo campionato, pero buscarán quedar o máis alto posible nos seus grupos. O Estudiantes forma parte do B1 xunto co Compostela, Carmelitas e Compañía de María, o seu primeiro rival. No caso do Ensino, no B2, estrearase na nova etapa da competición enfrontándose ao Seis do Nadal. O Blanco Amor e o Peleteiro completan o seu grupo.