A segunda xornada da nova etapa da competición deixou o mesmo número de vitorias que de derrotas

Unha de cal e outra de area para os catro conxuntos lucenses na segunda fase da Primeira cadete.

Consulta as clasificacións aquí

Masculina

O Ensino masculino segue progresando na segunda fase e esta xornada venceron a domicilio ao Compostela. Os lucenses comezaron moi ben o primeiro cuarto, con moita intensidade e ritmo anotador, ademais de controlar aos dous mellores xogadores de Santiago. Colleron cedo a distancia no marcador, axudados dende a defensa, con bo ritmo en ataque e acerto exterior.

Os locais plantaron unha zona que aos ensinistas lles custou atacar, pero pouco a pouco volven achegarse á cesta e fóronse ao descanso con máis de 30 puntos de vantaxe. Tralo paso polos vestiarios a saída á pista non foi nada boa e non conseguiron o terceiro parcial ata o final do cuarto. No último aproveitaron a rotación do Compostela para seguir un ritmo alto de xogo e matar o partido cun resultado de 49-102.

COMPOSTELA 49 - 102 ENSINO

Feminina

Na feminina, o Ensino caeu na loita polo campionato. Enfrontáronse a domicilio contra o Compostela, un rival superior ao que lle lograron competir en moitos momentos do partido. Os tres primeiros cuartos estiveron moi igualados en tódalas facetas do xogo, pero no último cuarto a fatiga fíxolles perder demasiados balóns.

Nos grupos de abaixo, ao Estudiantes se lle escapou o duelo contra o Ferrol, pero o Burela conseguiu unha vitoria a domicilio. As celestes disputaron un duro encontro no que na primeira parte perderon moitos balóns, pero mantivéronse no partido. Os fallos baixo a cesta e nos tiros liberados permitiron que o partido estivera igualado, ata que no último cuarto chegan a ir sete puntos por baixo e só lles quedou reaccionar. Volveron fallar un par de cestas fáciles, mentres que o Baxi atinou nos tiros libres e levouse o partido por 43-46.

Pola parte do Burela, impúxose ao Bosco Salesianos en Ourense. Empezaron o partido bastante faltas de intensidade e con poucas ideas en ataque. Malia isto, os cambios na estratexia defensiva as axudaron a correr e roubar balóns para darlle a volta ao marcador. Dende o segundo período foron crecendo e sacaron o duelo adiante cun resultado de 36-51. 

COMPOSTELA 78 - 53 ENSINO

ESTUDIANTES 43 - 46 BAXI FERROL

BOSCO SALESIANOS 36 - 51 BURELA