Baixo o título de ‘Un mar de cultura’ Vicente Míguez falou onte na sala multiusos do concello dentro do ciclo organizado polo Seminario de Estudos Terra de Viveiro. Unha exposición e o visionado de cinco vídeos ilustrou a charla.
Cal é o obxectivo da charla?
Reivindicar a importancia do medio mariño e das súas xentes como valor cultural. Estamos acostumados a velo como fonte de recursos pesqueiros, pero tamén é importante no comercio e a comunicación. Penso que desde a escola se deberían ensinar outros valores, xa que tamén é un espazo para disfrutar da paisaxe, para o aproveitamento turístico e para os deportes náuticos.
Está presente na literatura?
Moito, a obra literaria máis lida dos últimos cen anos, ‘A illa do tesouro’ de Stevenson, non se entendería sen el.
