VERÓNICA GAYOSO SOBRADO, XERENTE DO CCA DE CHANTADA. Comezou como xerente do Centro Comercial Aberto (CCA) de Chantada cando só tiña 22 anos e agora, tres despois, cre que a súa xestión durante este tempo foi positiva e que hai que apostar polo comercio dixital como vía de crecemento dos negocios da localidade
A súa xuventude e o seu interese porque os cambios teñan lugar o antes posible fixeron que, dende que comezou como xerente do Centro Comercial Aberto (CCA) de Chantada, Verónica Gayoso Sobrado fose unha peza destacada dentro do panorama do asociacionismo comarcal en Galicia. Asegura que nas primeiras reunións nas que participou a nivel rexional ela era a «iogurina» do grupo e que houbo xente á que lle custou tomala en serio. A responsabilidade e a seriedade no seu traballo, afirma, axudoulle a que hoxe sexa unha máis. Precisamente esa xuventude da que fixo gala nun pasado lévaa a estar en contacto coa actualidade e a afirmar que o que hoxe precisa o comercio chantadino é renovarse e aproveitar as novas tecnoloxías.
Que balance fai dos tres primeiros anos á fronte da xerencia?
Creo que é positivo. Foron anos nos que houbo momentos bos e momentos malos, como pode suceder en calquera empresa ou negocio, pero en xeral puidéronse desenvolver e manter diferentes proxectos que axudaron ao comercio de Chantada a seguir adiante nestes tempos.
