CANDO A NÉBOA comeza a baixar, no Cebreiro séntese que nesta paisaxe de alta montaña ocorre algo propio dos contos quiméricos, pois o ceo semella querer xunguirse coa terra; con ese chan que foi pisado por tantas xeracións de campesiños e atravesado por peregriños de tódalas partes do mundo, os cales viaxan ata Compostela seguindo o roteiro do Camiño Francés.
Neses intres onde estas dúas partes parecen encaixar nunha soa, xermola a sensación de estarmos a dar pasos entre carreiros de algodón; trátase dunha andaina lenta e desviada ás veces pola translucidade desas nubes doces, mais tamén un tanto traicioeiras que de súpeto son quen de interromper a visión do hourizonte.
O Cebreiro desprende por veces un aire brusco que se vai porfiando no ambiente ata crear un ritmo que marca o tempo e o espazo deste lugar. Deste xeito, preséntese que a historia colectiva do pobo quer revolverse e facernos viaxar ata periodos lonxanos, coma os de antes da chegada dos romanos, cando as pallozas constituían a vivenda familiar dos seus habitantes. Arestora estas construcións forman parte do Museo Etnográfico, pois son as testemuñas que quedan daquel tempo no que a nosa terra aínda non era chamada Gallaecia.
Envoltos noutra ráfaga de ar fresco e asubiante podemos seguir paseando ata onde os nosos ollos albiscan o santiario de Santa María Real do Cebreiro, unha edificación de arte prerománica,a cal nalgún tempo fixo as funcións complementarias de hospital e priorato.
Tal como informan na propia páxina do Concello de Pedrafita do Cebreiro, o santiario comezou a gozar de esplendor que aínda hoxe conserva coa chegada no ano 1072 dos monxes franceses de Aurelliac, aínda que o primeiro hospital xa fora posto durante o ano 835.
Porén, se por algo destaca este espazo relixioso, é por mor dun milagre que disque se tornou moi popular no século XIV. Hortensia Pombo Carballo, muller de 83 anos de idade asentada na aldea de O Seixo (Pedrafita do Cebreiro), explícanos a lenda deste xeito: "Esta historia din que lle sucedeu a un home con moita en fe, que vivía en Barxamaior. Ocorreu nun día invernal de abundante frío e neve, no que a pesar das inclemencias do tempo o fregués quixo acudir á misa no Cebreiro. Cando chegou aló seica lle caían os carambelos de neve do pelo e o monxe con ton burlón sentenciou o seguinte: 'Este hombre viene a misa con tan gran tempestad y fatiga a ver un poco de pan y vino'. De súpeto, a hostia transformouse en carne e o viño, en sangue. Cando era cativa tamén me contaron que deseguido o monxe metérase na sancristía e xa non puidera botarse fóra dela".
Na actualidade, Santo Milagro é recordado na data do día 9 de setembro de cada ano cunha festa que se realiza na súa honra, xusto un día despois de que se faga a celebración do día de Santa María Real do Cebreiro; é tradición que durante eses días de festexos lle sexa permitido ao público achegarse a bicar as súas reliquias. Asimesmo, na igrexa tamén se albergan pezas relevantes do arte románico, como o Cálice e a Patena.
VIRXES. Continuando a conversa con Hortensia resulta de interese escoitar saír dos seus beizos a narración dun feito acontecido en torno á talla de Santa María. "Nós tiñamos unha santa moi fermosa que se trocou por outra. Eu aquela santa vina ben e sei que non se parecía en nada á que hai agora", lembra.
Este relato que explica esta muller da alta montaña é algo do que se ten comentado moito na zona, mais que durante un tempo foi un murmurio silenciado e pouco denunciado polos seus habitantes. Pola contra, xa hai uns anos que un equipo de investigación do patrimonio estudou este caso de suplantación das virxes e manifestouse a prol dos que insisten na existencia dun cambio e non dunha restauración, tal como afirmou no seu día a versión oficial da igrexa.
De seguirmos facendo camiño, pasado Liñares, chegamos o alto de San Roque, situado a 4 kilómetros do Cebreiro. Neste punto atópase unha escultura de José María Acuña, que data do ano 1993. A figura dun peregriño desafiando a tempestade pretende ser unha homenaxe a tódolos camiñantes con destino a Santiago, que normalmente adoitan facer unha parada de descanso neste lugar.
Non obstante, se o paseante opta por afastarse aínda máis do Cebreiro, a seis kilómetros del atopará o Hospital da Condesa. O seu propio nome garda relación con feitos vividos, pois no século IX a muller do Conde Garzón, coñecida como Dona Egilio, fundou aló un hospital. Nesta aldea tamén se atopa actualmente un albergue para o reposo dos peregrinos e a igrexa románica de San Juan, a cal conta cunha torre á que é posíbel subir empregando unha escaleira exterior.
Dentro das opcións a barallar despois desta visita pode estar retroceder un chisco dende o Hospital da Condesa ata o camiño que conduce ao Courel; tomada esta desviación é posíbel parar en Pacios, pertencente a Pedrafita do Cebreiro.
FEUDAL. A xente deste pequeno punto do mundo coñece ben a historia transmitida por moitas xerácións sobre o señor feudal de Pacios, que destacaba pola súas desorbitadas posesións e tiranía. A día de hoxe consérvase aló a casa señorial pegada á igrexa, a cal nalgún momento foi de uso exclusivo da familia do señor e daqueles que traballaban para el.
Dende Pacios pódese abandoar a estrada do Courel e torcer cara unha desviación que indica O Seixo,unha aldea que pertence á parroquia de Pacios. Este lugar que sufre os efectos do despoboamento rural posúe un escaso número de habitantes que viven en base ás pequenas explotacións agrarias e gandeiras.
VALES. Se nos adentramos nos montes do Seixo podemos ir parar ata Pena de Vales. Dende este punto somos testemuñas vivas dunhas vistas panorámicas, onde a natureza parece impoñerse sobre nós , o seu pulso síntese later con forza dende as raizames fondas da terra; bidueiros, castiñeiros, xestas floridas,margaridas na primavera, sabanetos ( digitalis purpurea) nos carreiros etc.
A paisaxe xoga continuamente fronte a nosa presenza e entre as alturas das montañas do Courel, Pedrafita do Cebreiro e Faro.
Ademais se aínda nos quedan folgos despois deste repouso, podemos coller cara o monte do Chao da Vella e seguir deste xeito o camiño que conduce ao Poio, onde outras historias agochadas na paisaxe agardan o intre para ser narradas e ouvidas. A fin de contas, así sobrevive a cultura popular dun pobo, a través da escoita activa de quen non quere deixala morrer.
As verbas do tempo en Pedrafita do Cebreiro
Os lugares deste municipio agochan unha historia que bebe dunha inmensa fonte de tradición popular, gardada a través do correr dos séculos