Os grupos políticos Ecogaleguistas, Encontro Irmandiño e Máis Galiza -tamén estaba convocado Xosé Manuel Pérez Bouza, de Acción Galega, quen non puido asistir- presentaron o sábado á noite, nun acto aberto ó público en xeral celebrado na casa da cultura da Pastoriza, as liñas mestras do proxecto conxunto para crear un partido galeguista, aínda sen nome, que se converta nun «novo referente político en Galicia» e que poida estar «plenamente operativo» de cara ás vindeiras eleccións autonómicas.
Co mes de setembro no horizonte -crese que Feijoo pode convocar as eleccións despois do verán-, os representantes destas tres forzas políticas puxeron de manifesto o obxectivo común de frear a «desafección política» e o desencanto xeralizado que se constata na sociedade, sobre o que pretenden definir un programa electoral que implique á unha pluralidade de xente e que lle dea resposta ás demandas sociais.
