Momán viviu a pasada fin de semana un momento histórico coa celebración da primeira Festa do Noso Futuro, programada pola asociación de mulleres rurais Saudade coa colaboración do Concello de Xermade e dirixida aos máis pequenos desta parroquia.
O escenario escollido para albergar esta cita de xogos e diversión foi o campo de fútbol da SD Momán, que se transformou nun parque de atraccións infantil cunha morea de actividades.
Así, algo máis de 40 pequenos, de diferentes idades, puideron aproveitar a xornada para interrelacionarse mentras saltaban con toda a ilusión do mundo nas colchonetas instaladas para a ocasión.
Ademais, monitores de Peques Park da Coruña, fixeron obradoiros de globoflexia e pintacaras para os pícaros, que non quixeron perder a ocasión de aprender e gozar destas actividades lúdicas.
As mulleres de Saudade organizadoras da cita instalaron tamén un photocall conmemorativo da cita e prepararon unha merenda para os pequenos asistentes, que estiveron acompañados en todo momento polos seus pais e avós, que tamén disfrutaron desta intensa xornada na que tampouco faltou a música e os xogos populares.
Despois da excelente acollida pese a ser unha actividade pioneira na parroquia de Momán, a bo seguro a Festa do Noso Futuro terá asegurada a súa continuidade no tempo.
