A subida do Ive

O descenso de máis dun 6% na recadación de impostos no primeiro semestre deste ano con respecto ás previsións establecidas está a levar ao Goberno a preparar novos recortes nos gastos e á subida de determinados impostos.

Segundo as declaracións do ministro de Facenda as subidas van estar centradas nos impostos indirectos e en especial no Ive, e non nos de tipo directo, deixando así de novo sen afectar os cidadáns de rendas e patrimonios máis elevados.

A nova subida de impostos corre pois o risco de seguir cargando o peso do axuste sobre as familias de rendas medias e baixas. Un caso especial pode ocorrer coa subida dalgúns tipos de Ive. Ademais do tipo xeral que carga un 18% sobre os bens ou servizos, hai outros dous con importes máis baixos que poderían verse afectados con esas subidas. O primeiro é o super-reducido cun 4%, que afecta entre outros a algúns produtos ou servizos básicos como os alimentos, os medicamentos ou dIversos servizos prestados a persoas maiores. O segundo, do 8%, aplícase entre outros aos transportes, hostalaría, servizos ás explotacións agrarias e á limpeza de vías públicas.

A repercusión social destas subidas pode ser moi diferente, pois o seu impacto depende en gran medida de factores como o nivel de renda, o lugar de residencia ou outros de tipo persoal como a idade ou a saúde. Por exemplo, a elevación do tipo do Ive do transporte ou dos medicamentos vai repercutir especialmente nas persoas que teñen desprazamentos diarios máis longos ao seu lugar de traballo ou maiores problemas de saúde.

Un exemplo do diferente impacto da subida do Ive pode observarse nuns produtos con tipo superreducido como son os alimentos básicos como o pan, o leite, os ovos, os legumes, ou as hortalizas, un grupo do que están excluídas as bebidas, que teñen o 8% de Ive. Segundo a enquisa de orzamentos familiares do Instituto Nacional de Estadística, o gasto nestes alimentos é diferente tanto en importe como en peso relativo segundo o nivel de renda dos fogares. No ano 2010 aqueles que tiñan uns ingresos mensuais inferiores aos 1.500 euros dedicaban uns 260 euros á compra de alimentos, que alcanzaba ao 18% dos seus gastos familiares. Pola contra os fogares con máis de 5 mil euros de ingresos dedicaban case o dobre, uns 530 euros, á compra de alimentos, pero só lles supoñía un 9% dos seus gastos correntes. Por iso o aumento do Ive nos alimentos pode ter o dobre de impacto nos fogares con rendas baixas.

No caso dos alimentos aínda é posible medir o efecto directo da subida do Ive segundo o nIvel de renda dos fogares. Para outros produtos como o transporte é máis difícil discriminar a subida entre quen está obrigado a realizar desprazamentos diarios por razón de traballo ou dos que o fan por pracer.

Por iso as posibles subidas destes tipos do Ive poden provocar unha nova carga adicional nas rendas baixas e medias que xa están a soportar máis os axustes en servizos públicos, aos que se pode unir este novo impacto desigual dos impostos indirectos.

Comentarios