Representantes do proxecto Sermos Galiza, unha iniciativa que pretende lanzar un semanario en papel e un diario dixital en galego, explicaron o proxecto onte en Lugo.
As escritoras lucense Marica Campo e María Reimóndez e máis o exconcelleiro compostelán Néstor Rego explicaron a iniciativa nun acto organizado polo club cultural Valle-Inclán e que se desenvolveu na galería Sargadelos.
Os promotores consideran este proxecto como «urxente e necesario nun momento de afastamento dos medios en galego». Sermos Galiza busca ofrecer un produto informativo novo e distinto «que defenda os intereses de Galicia na nosa lingua, que cree redes de participación e sexa a voz da cidadanía; en definitiva, un proxecto colectivo para os que cremos nestes país».
O Grupo Promotor de Sermos Galiza fixou o obxectivo de capital social da empresa de comunicación en 300.000 euros, dividido en 3.000 accións de 100 euros. O pasado día 19, os promotores aseguraban que superaran os 100.000 coas achegas de 245 socios.
