A Deputación de Lugo súmase á conmemoración do ano de Xosé María Díaz Castro co acondicionamento dun roteiro de sendeirismo homologado en Guitiriz, que levará por nome Ruta da Pedra e que unirá a casa natal do poeta, na aldea do Vilariño dos Vilares, co campo da festa da veciña parroquia do Buriz, presidido por un monolito na súa honra.
Regina Polín, deputada de deseño e artesanía, ademais de veciña de Guitiriz, destacou que este itinerario non será só unha proposta cultural, senón tamén «natural, social e económica», xa que discorre por paraxes naturais, está deseñada para que os camiñantes «o pasen ben» e ademais conlevará a mellora de camiños en mal estado, polo que tamén se verán beneficiados os propietarios das fincas próximas. «Trátase, en definitiva, de potenciar o rural», asegurou Polín.
O deseño do percorrido inspírase na nenez de Díaz Castro, quen percorreu moitas veces a pé a distancia que separa a súa casa do Vilariño e o Buriz, a onde ía a escola.
