Reaccións mornas a xestos graves

APARECEN membros das xuventudes dun partido fotografados brazo en alto en signo fascista e non se reacciona con escándalo colectivo. Un alcalde xustifica o franquismo e segue no posto coa venia do grupo político ao que pertence e dos veciños que o amparan. Será porque na Transición se foi excesivamente permisivo cos que viñan do antigo réxime, que non só non foron castigados senón que se lles permitiu a defensa do sistema ditatorial. Se en Alemaña alguén apoia o nazismo ten moitas posibilidades de acabar na cadea, e se nega o Holocausto, seguro; pero en España sacar bandeiras preconstitucionais ou soster, como o rexedor de Baralla, que os condenados a morte no franquismo merecíano, atopa milleiros de nostálxicos da época anterior que poden vitorealos apelando á liberdade, a mesma que non tiveron os represaliados e a que eles arrebatarían a calquera que non pense como eles.