Rachar co monopolio legal da violencia

O ESTADO ten o monopolio da violencia, é o único que pode exercela legalmente a través das forzas e corpos de seguridade, para salvagardar os principios dos que os cidadáns se dotan a través dos seus representantes. Ou iso se considera ata agora, porque no seu afán privatizador (eufemisticamente, externalizador de servizos) o Goberno pretende que os gardas de seguridade exerzan de policías, podendo incluso deter. Esta nova lei, chamada de seguridade cidadá (outro eufemismo, porque non deixa de estar concibida sobre todo para reprimir mobilizacións, sempre molestas aos que mandan), incrementa o nivel de coacción que se lle presupón a calquera norma e agacha a pretensión de acalar críticas e incomodar a quen se lle ocorra exteriorizar o rexeitamento de decisións que non lle sexan acaídas, incluso para reclamar exclusividade para unhas malleiras públicas e de calidade.