Próximos aos partidos coma os militantes

TEMOS un presidente do Constitucional que escondeu ás Cortes a súa militancia política, e o que é peor, que nove dos outros once maxistrados avalaron esta ocultación como se fose normal. Paréceme intranscendente que un cargo xudicial pertenza a un partido, de feito seguro que se contan por ducias os maxistrados que sen ter carné de militante están ideoloxicamente tan próximos coma os que o teñen; pero ben distinto é agachalo aos representantes elixidos polos cidadáns. A neutralidade é imposible ao pasar pola peneira persoal, de aí que ningunha profesión sexa aséptica. Así hai sentenzas cargadas de doutrina, homilías que levan aparelladas mensaxes de ideario ou talibáns da información máis defensores das posicións gobernamentais ou da oposición que os portavoces parlamentarios dos partidos. O problema non é a militancia, son a indecencia e a deshonestidade.