O QUE NACÍA hai uns meses como unha proposta do goberno local para regular o uso dos areais está a trocar en importantes disensións entre o Concello e os veciños e turistas de Barreiros que consideran, na súa maior parte, innecesarias e excesivas este tipo de medidas.
Nestas épocas estivais as praias de toda a Mariña lucense están recibindo a diario miles de turistas que se achegan dende tódolos puntos da península e incluso de Europa para disfrutar das preciosas paraxes que ofrece este litoral e, se hai sorte, do bon tempo.
Agosto está a ser o mes de moito tránsito, e máis concretamente na zona do litoral que abrangue o concello de Barreiros. Pero este ano a visita aos diversos areais que ofrece a localidade pode estar cambiando debido á nova normativa que o PP local propuxo e publicou no Boletín Oficial da Provincia do pasado 26 de xuño.
