viernes. 04.12.2020 |
El tiempo
viernes. 04.12.2020
El tiempo

A primeira festa romana e castrexa de Friol logra congregar a 25 asociacións

Membros da Cohors III Lucensium, de Tierra Quemada.
Membros da Cohors III Lucensium, de Tierra Quemada.
Co nome de Friulio, este evento enmárcase na XXV Festa do Queixo, que se celebra este domingo ►O paseo do Narla foi escenario de recreacións históricas que se prolongaron ao longo do día

O preámbulo do vintecinco aniversario da Festa do Queixo e Pan de Ousá, que este domingo celebra o municipio friolés, tivo sabor de recreación histórica. Un total de 25 asociacións procedentes de toda Galicia e do resto do Estado apoiaron onte a celebración da primeira edición da festa castrexa e romana de Friol, o Friulio, á que tamén se sumaron centos de visitantes e veciños.

Dende as 11 da mañá, o paseo fluvial do Río Narla puido recorrerse en dúas direccións en función do destino: o poboado castrexo ou o campamento romano. Entre un e outro, ducias de artesáns de toda Galicia expoñían as súas creacións de coiro, fieltro, produtos de alimentación ou instrumentos musicais, co son que aportaban as agrupacións de música tradicional.

O entorno fluvial tamén foi escenario privilexiado da escaramuza castrexo romana ás 13 horas, un dos momentos máis esperados da xornada, onde loitadores dun e doutro bando mediron as súas forzas. Pero o espíritu bélico non durou moito e a batalla quedou nunha aperta entre os membros da Cohors III Lucensium e os Mercenarios Galaicos.

Ás 14 horas, todos os participantes enchían a carpa habilitada na Praza de España para presenciar a entrega de obsequios ás asociacións colaboradoras por parte do xornalista friolés David Espiño.

O primeiro Friulio contou coa presenza de 25 membros da asociación Tierra Quemada, que se desprazaron dende Soria

Especiais ovacións tivo a Asociación Cultural Celtibérica Tierra Quemada, procedente de Soria, e da que se desprazaron 25 membros para apoiar esta primeira edición dunha festa que aspira a consolidarse no calendario friolés.

O maior clamor foi, sen embargo, para a asociación organizadora do evento, A Castronela, da que Espiño destacou o "sentimento e a paixón" para montar "todo isto". Tamén o alcalde, José Ángel Santos, suliñou o labor desta asociación organizadora dos festexos xunto co Concello, e agradeceu a presencia de todas as entidades que colaboraron no evento e de todos os asistentes.

Despois da sesión vermú e da comida, na que se involucraron os hostaleiros da zona coa caracterización dos seus establecementos, a programación da tarde contou con demostracións, xogos, ofrendas e talleres de moeda e de barro, entre outras actividades.

Despois do asedio ao Friulio, o colofón da recreación histórica recaeu na asociación Tierra Quemada, que escenificou o enterro celtíbero, ás 20.15 horas. Pero a festa non acabou aí, senón que continuou coa música como protagonista, coas agrupacións Gaia Pandereteiros, Trécolas, Tango en Xaneiro, Alvariza, Claxxon e Dj David Expósito.

Este domingo pola mañá tamén haberá desfiles castrexos e romanos por diferentes puntos da vila, así como música tradicional. Aínda que os verdadeiros protagonistas da xornada serán o queixo de Friol e o pan do Ousá, que a diferencia de romanos e castrexos, sempre se levaron ben ao longo da historia.

A primeira festa romana e castrexa de Friol logra congregar a 25...
Comentarios