UN SELECTO grupo de 80 alumnos de cuarto de Eso, novas promesas da ciencia a nivel estatal, déronse cita en Soria nun Campus de Profundización Científica promovido polo Ministerio de Educación, que se celebrou en dúas quendas ao longo deste mes. Entre eles atópase a moza sarriá Paula Saá Tourón, que acaba de rematar os seus estudos no colexio de La Merced e para quen a experiencia resultou "moi interesante".
"A experiencia é moi interesante", asegura a moza sarriá, quen quere orientar o seu futuro á rama da medicina
Paula Saá, de 15 anos, foi a única representante de Galicia na segunda quenda do campus, que se desenvolveu dende o día 19 ata este venres. Segundo explica, alí compartiu actividades educativas e de ocio con mozos chegados dende lugares como Ibiza, Valencia, Toledo, Asturias, Barcelona ou Valladolid, entre os que fixo "moitas amizades", ademais de adquirir unha morea de coñecementos.
O Ministerio de Educación, Cultura e Deporte convoca este campus para alumnos de cuarto de Educación Secundaria Obrigatoria de centros docentes sostidos con fondos públicos, co obxectivo de favorecer neles o desenvolvemento do interese científico, potenciar as súas capacidades –demostradas ao longo do curso, como reflicten os seus expedientes académicos– e fomentar o esforzo individual e a motivación dos estudantes, segundo consta nas bases da convocatoria. Ao mesmo tempo, esta iniciativa contribúe á convivencia e ao intercambio de experiencias educativas e culturais entre mozos de distintas comunidades autónomas.
Os requisitos para poder participan consisten en obter unha nota media no curso escolar 2014/2015 superior ou igual aos 9 puntos e estar matriculado durante o curso 2015/2016 nas materias de matemáticas b, física e química, bioloxía e xeoloxía.
Segundo sinala Paula Saá, foi a súa mestra de bioloxía, física e química quen a informou sobre a existencia deste campus, ao que accedeu cunha media de 9,83, unha decisión da que non se arrepinte en absoluto. "Eu volvería, porque aprendemos moitas cousas que teñen a súa aplicación na vida diaria", asegura.
Durante eses días, a alumna sarriá viviu unha actividade frenética. Gran parte das xornadas adicounas a participar en conferencias, obradoiros ou clases experimentais da man de distintos especialistas nas materias. "Asistimos a talleres para aprender, por exemplo, a mirar a idade das árbores. Tamén fixemos cultivos de bacterias ou asistimos a charlas sobre enerxías renovables. Son actividades entretidas e dinámicas, traballando en equipo, polo que é máis ameno", apunta a moza, quen lembra que non todo é estudo neste campus. "Tamén hai actividades culturais, como unha visita a Soria con guía, ou deportivas, como kayak no río Douro".
O excelente expediente académico desta alumna, que o vindeiro curso estudará no colexio Galén de Lugo, é froito da "constancia" e de prestarlle atención ás explicacións dos mestres. "Atender na clase é o principal, diría que un 60%, e o 40% restante o traballo na casa", comenta. Afeccionada aos deportes acuáticos como natación ou surf, sente vocación pola medicina e, en particular, pola especialidade de pediatría, aínda que tampouco desbota a opción de orientar o futuro a "investigar enfermidades en laboratorio".
