O XLII Certame Literario de Vilalba xa ten gañadores. Xosé Otero Canto, da Ponte de Outeiro de Castro de Rei, e a vilalbesa María Xosé Lamas foron designados respectivamente como primeiro e segundo premio do concurso poético máis antigo de Galicia, iniciado no ano 1975 e que cada ano ten "unha colleita máis vizosa".
O poemario Telúrica fixo merecedor a Otero Canto desta importante distinción, recoñecida con 3.000 euros, flor natural e diploma. Pola súa banda, o segundo posto de Lamas débese ao seus Sonetos preposicionais, presentados co lema Un anaco de vida en catorce versos, polos que recibirá mil euros, flor natural e diploma.
O director da Real Academia Española, Darío Villanueva; a xefa territorial de Cultura, Carmen Gueimunde González; o director do grupo Radio Principal, Fidel Fernán Vello; o edil de cultura, José Antonio Pita, e o xornalista Xulio Xiz integraron o xurado do XLII Certame Literario, cuxos premios se entregarán, como é costume, o día 30 deste mesmo mes no auditorio Carmen Estévez de Vilalba.
O seu ditame deuse a coñecer durante a presentación dos libros premiados na edición de 2015, publicados un ano máis polo Concello de Vilalba e a editorial Alvarellos.
Aínda que se trataba dun acto literario, a música tivo moita presenza, tanto pola ambientación da violonchelista Noa Carballal, que interpretou tres pezas de Bach, como polos propios poemarios presentados, dos que a música compón unha parte esencial.
Así, o gañador do XLI Certame Literario, Modesto Fraga, un dos "adalides do batallón literario de Fisterra", presentou o Adagio por outono, un libro de sonetos que bebe das composicións musicais e se inspira na versificación poética de Dante, Petrarca, Darío Xohán Cabana ou Rábade Paredes.
Outro tanto fixo o compositor coruñés Paulino Pereiro, autor de Poemas de ruxido e barruzo, que logo de recoñecer que "música e poesía teñen unha conexión totalmente indisolubre", precisou que a súa obra, que ten a estrutura dunha sonata con dúas partes enfrontadas, é totalmente chairega, xa que 30 dos 33 poemas foron escritos en Lanzós, usando a fala da Terra Chá.
Xunto aos autores estiveron o edil de cultura, José Antonio Pita, e o alcalde, Gerardo Criado, quen se sumou á lembranza de Agustín Fernández Paz feita por Modesto Fraga, destacando a importante tradición cultural, literaria e musical que ten Vilalba.
