Jueves. 27.06.2019 |
El tiempo
Jueves. 27.06.2019
El tiempo

Os campos da feira renóvanse para seguir sendo referencia

Mercados de Vilalba
Mercados de Vilalba
Os concellos apostan por acondicionar as infraestruturas dos mercados para potenciar o comercio tradicional na comarca. Galpóns, baños públicos, cubertas e aparcamentos son algunhas das melloras coas que contan na actualidade estes espazos

O século XXI chegou para modificar os hábitos de consumo dos chairegos (de todo o mundo, máis ben). En pleno 2015 e camiño de 2016, o vocabulario cotián está cheo de ‘black fridays’, ‘cyber mondays’, Ikeas, Aliexpresses, Primarks ou centros comerciais cuxa superficie se mide xa en campos de fútbol. Porén, emulando a aquela aldea de irreductibles galos que resistía (aínda e sempre) ao invasor, existe un lugar afastado do remuíño globalizante que conserva os valores tradicionais da compravenda galega: as feiras.

Os campos da feira foron o principal punto de encontro veciñal durante moitos anos, lugares non só para mercar e vender, senón tamén de reunión e de ocio. Moitos destes emprazamentos sufriron durante anos o abandono e deterioro propio do cambio nos hábitos de consumo que se mencionaron con anterioridade, porén nos últimos tempos tanto concellos como asociacións veciñais impulsaron a recuperación destes espazos senlleiros e a consolidación de eventos para que se manteña a súa función primixenia.

Un exemplo desta recuperación atopámolo no concello de Castro de Rei, cunha actuación que está en pleno proceso de execución. A través dun obradoiro de emprego da Xunta de Galicia, estanse a restaurar e a rehabilitar os postos do antigo campo da feira de Castro Ribeiras de Lea. Segundo explicou o alcalde do municipio chairego, Francisco Balado, estes traballos poderían estar finalizados a finais do próximo mes de xaneiro.

Outro Concello que aposta pola renovación dos espazos adicados ao mercado é Guitiriz, cuxas feiras gozan dunha saúde envexable. En Parga, hai xa varios anos que o recinto lavou a súa faciana: "Recuperáronse os cobertizos do campo da feira. Houbo unha limpeza das instalacións, e retiráronse as pedras que caeran polo paso do tempo", explicou Regina Polín.

A rexedora recoñeceu que quere dar un paso máis na melloría das infraestruturas municipais: "Estiven recompilando información e hai anos había uha feira nos Vilares, onde aínda queda algún alpendre. A medio prazo gustaríame tamén, se se pode, rehabilitalos", asegurou a alcaldesa.

A Pastoriza tamén traballa para que Bretoña continúe sendo un mercado de referencia: "Estase rehabilitando un pequeno espazo e, sobre todo, un local para que a xente o poida empregar para o que necesite, como para comer, por exemplo", asevera o alcalde pastoricense, Primitivo Iglesias, que confía en que as obras estean finalizadas antes de que remate o presente ano.

Gontán, en Abadín, pode presumir de campo da feira. O Concello vén de rematar as obras do acondicionamento deste espazo, que se estrenaron na concorrida Feira de Santos: "Puxéronse baños públicos novos, delimitáronse as prazas de aparcamento e actuamos na nave onde están os cochos, cerrándoa e revestindo o recinto polos lados. Tamén se instalaron infraestruturas metálicas que se empregan para aparcar as bicicletas", comenta a tenente de alcalde de Abadín, Patricia Fraga.

Unha das maiores renovacións realizadas nos últimos tempos foi a do campo da feira de Vilalba. Como explica o rexedor vilalbés, Gerado Criado, "non se parece en nada ao que había".

Foron varias as intevencións que se executaron entre 2014 e 2015 na capital chairega: "Empregamos aproxidamente 200.000 euros para acometer unha reforma integral nos 8.000 metros cadrados dos que consta o campo da feira. Reformamos completamente o chan e púxose unha capa de aglomerado en quente á metade da superficie. Mellorouse a iluminación, fíxose un repintado e adecentamento do perímetro e a última das actuacións consistiu en mellorar dous galpóns onde se come o polbo", asegura Criado.

"Temos que ter en conta que o campo da feira de Vilalba non é o típico que se emprega unha vez ao mes. Contando os días de mercado e os da feira, e engadíndolle ademais que o aparcamento se emprega cada vez que hai un evento no pavillón, constatamos que a metade do mes está a ser empregado", recalca o rexedor, que adiantou que para o ano que vén "ampliaranse as zonas de aparcamento en máis de 400 prazas".

E se foron importantes as melloras en Vilalba, non o foron menos no recinto do campo de Feira do Monte, unhas obras que foron definidas polo propio alcalde de Cospeito, Armando Castosa, como "a actuación, desde o punto de vista urbanístico, máis importante da historia de Cospeito".

"Non quedou nin un só metro cadrado sen renovar", engade Castosa. A reforma do campo da feira levouse a cabo durante varias fases: "Primeiro remodeláronse os galpóns onde antigamente se gardaba o gando. Agora hai dúas edificacións cubertas con teito de pizarra e divididas en stands. Aos galpóns engadímoslle dous anexos, unha zona de aseos e baños e tamén unha zona de recepción e oficinas de radio e televisión para os días de feira. Despois remodelamos unha superficie de 1.000 metros cadrados onde había edificacións vellas e agora é un espazo agradable, dotado de mobiliario. Do mesmo xeito, construímos unha pista multifuncións e outro espazo para gozar da gastronomía das feiras, esencialmente pulpo", enumera o rexedor.

Outra das actuacións que se pretende finalizar nos próximos tempos é a do local do polbo da Fraga, nas Pontes. O concello pontés investirá 156.000 euros en modernizar as instalacións e gañar máis espazo. Así, renovarase a cuberta, pecharase a zona da grella e cubrirase a construción porticada anexa. O chan e os aseos veranse mellorados tamén.

Con menos recursos, pero idéntica enerxía pola dinamización dos espazos, atópase Muras. O municipio chairego vén de inaugurar un evento -a Feira do Mel- proxectado para quedarse, por eso e porque unha instalación forte favorece o desenvolvemento de actividades nela, o Concello confía en mellorala a curto prazo: "A idea que temos é, para o ano que vén, recuperar o espazo que temos no Viveiró. Queremos rehabilitar a praza, restaurala e poñela en condicións, e a partir de ahí proxectar o que podemos facer nela", asegura Manuel Requeijo, máximo mandatario municipal murense.

No Concello de Meira, o anterior goberno municipal realizou unhas obras de mellora dos barracóns onde se come o polbo entre os anos 2012 e 2014. Estas obras consistiron na colocación de ventás e a renovación das portas para evitar correntes e espazos abertos no interior.

Mosteiro, capitalidade municipal do concello de Pol, viu hai uns anos mellorado o seu campo da feira: "Fíxose unha caseta que se emprega para comer o polbo, e ao lado do campo da feira, construíuse un parque infantil para que poidan xogar os nenos pequenos", asegura o alcalde Lino Rodríguez.

O movemento veciñal tamén supón un elemento moi importante para que estes lugares de reunión mercantil evolucionen co paso do tempo. Sen ir máis lonxe, en Begonte, na parroquia de Gaibor, o notable aspecto que presenta o seu campo da feira ten que ser atribuído aos veciños, como ben explicou o alcalde José Ulla: "A rehabilitación correu a cargo da asociación de veciños. No campo hai uns cobertizos, arranxáronos e tamén os relousaron o ano pasado", explica o rexedor.

Os campos da feira renóvanse para seguir sendo referencia
Comentarios