«Achegar a música aos cativos é o obxectivo deste concerto didáctico que facemos cada ano en Monforte», explica o director do conservatorio Mestre Ibáñez, Fernando Sanmartino Pérez, en ferencia á actuación que tivo lugar no auditorio do edificio multiusos da cidade do Cabe, na que o público miúdo puido gozar das melodías a poucos metros dos músicos xa que estiveron no piso, moi próximos aos instrumentos. «Os nenos están no chan para que o evento sexa máis cercano e haxa maior contacto e posibilidade de interactuar», apunta o director.
«A finalidade é que os escolares dos centros de ensinanza monfortinos coñezan os instrumentos de preto e tamén os diversos tipos de música cos que se traballa no conservatorio, xa que no concerto soou música clásica e tamén moderna», conta o director e profesor do centro.
Os encargados de ofrecer o concerto foron tanto alumnos coma mestres do conservatorio. Estas actuacións, ademais de para achegar a música ao público máis pequeno da cidade do Cabe serven tamén para que os novos músicos, que estudan no conservatorio, amosen o que aprenderon durante a súa formación.
A xornada de concertos didácticos dividiuse en dúas sesións e deste modo houbo música pola mañá e pola tarde. En total asistiron á xornada 320 cativos dos centros Ferroviario, Torre de Lemos, colexio Novo e Gándara. O auditorio estaba composto por pequenos do último curso de educación infantil e ata terceiro de primaria.
Estudar música no conservatorio Mestre Ibáñez da cidade do Cabe é posible dende o ano 2000. Na actualidade o centro conta con 128 alumnos nas diversas especialidades que presenta dentro da súa oferta educativa.
Ademais dos concertos didáctivos anuais, dende o conservatorio levan a cabo outras actividades. Algunhas das citas fixas son o concerto de Nadal, a sesión de conservatorio na rúa e os festivais de fin de curso.
A finais do vindeiro mes, as músicas do conservatorio invadirán as rúas da zona vella de Monforte. «Repartirémonos por familias de instrumentos en diversos puntos da zona peatonal e logo para finalizar a xornada daremos un concerto conxunto», explica Sanmartino.
Tamén para as próximas semanas terá lugar o festival de fin de curso do conservatorio. «E este ano, ademais haberá festival de fin de curso de danza», di o director. Amosarán danza clásica, moderna, de salón e tamén tradicional.
No vindeiro mes, os músicos sairán á rúa con concertos ao aire libre e tamén celebrarán os festivais de fin de curso
