Muras celebra as Xornadas de Degustación de Carne de Poldro

Dous locais de hostalería do núcleo urbano e un do Viveiró apostan por poñer en valor este produto antes da feira, que será o día 24

Tres locais hostaleiros de Muras apostan pola carne de poldro coa súa participación nas III Xornadas de Degustación, que se celebraron esta pasada fin de semana e que continuarán os próximos días 22 e 23.

A degustación é gratuíta e os locais participantes son tres: A Volta e o Bar Santi, no núcleo urbano de Muras, e Picapán Casa Vituco, na parroquia do Viveiró. Cada un deles presentará dous pratos e as persoas que degusten tódalas tapas dos establecementos colaboradores participarán no sorteo de tres premios, con entrada ao clube termal do Spa Attica 21 de Vilalba e comida ou cea.

No bar A Volta, a primeira proposta é un arroz con poldro e a segunda, carne estofada. No Bar Santi, haberá poldro ao caldeiro e carne estofada con salsa de queixo. No Pipacán Casa Vituco, pola súa parte, as opcións son unhas albóndigas de poldro con magro de porco celta e croquetas de carne ao caldeiro.

As Xornadas de degustación de Carne de Poldro organízanse dentro do programa de actos deseñado para a XXX Feira do Poldro, que se celebrará o día 24 e incluirá diversas propostas e máis gastronomía. Antes, o 23, está previsto un roteiro de observación de cabalos no Xistral, seguido de xogos ecuestres e olimpíadas rurais.

Comentarios