Todo era novo e todo era vello para Marcos Pin. Era a primeira vez que inaguraba oficialmente o Festival de Jazz de Lugo, nunca antes fora líder á fronte dunha banda no Círculo das Artes de Lugo e presentaba temas propios en formato orquestral.
Ao tempo, todo lle resultaba cercano porque Marcos Pin é un músico nacido en Lugo, que se formou musicalmente entre a academia Aulos e o club Clavicémbalo, que vén sendo o brazo noturno e clandestino do certame jazzeiro. O guitarrista regresaba ao Círculo das Artes, onde xa actuara como integrante de banda, e facíao rodeado dunha panda de amigos sobre os que era quen de destacar tanto a súa orixe galega como o seu currículo nos locais afumados de Estados Unidos e a Europa máis occidental. As pezas que interpretou «xa os tocara en tríos e cuartetos, pero o que fixen foi recompoñelos, poñer en marcha novamente a máquina, de aí o nome do grupo que me acompaña, Factor-E-Reset, un xogo de palabras que se refire a reiniciar a fábrica», comenta o artista.
En Lugo reiniciou onte a súa imaxe como músico presentándose con nove colegas e un director, o galego Diego García, importado dende o seu traballo en Londres para a ocasión. Esta última figura é «necesaria pola cantidade de intérpretes, para guiarnos tanto en ritmo como en forma aos que integramos o decateto, unha formación entre combo e orquestra».
Marcos Pin citaba a Duke Ellington para afirmar que «a orquestra é un instrumento», polo que se preocupaba de como había de soar «porque, a maiores de cuestións obvias, como a orquestración, os temas teñen unha sonoridade moi distinta e unha vida nova».
A formación de Factor-E- Reset responde a unha visión concreta e arriscada de Marcos Pin, pois inclúe instrumentos que lle gustan pola sonoridade peculiar, como o vibráfono —que toca o seu compañeiro de estudos en Holanda, Ton Risco— ou o bombardino. En todo caso, este proxecto sérvelle para desenvolver as súas dúas liñas formativas: guitarrista e compositor. Mentres se formaba, Marcos Pin aprendía a tocar sobre ‘standars’ dos clásicos: Led Zeppelin e Deep Purple. Un concerto dun grupo catalán de jazz no cluc Clavicémbalo reconduciu a súa vocación musical. O seguinte paso foi descubrir a Columna B, un grupo de estrelas que se vía na a obriga de tocar temas populares de todos os tempos nunha discoteca de Lugo para poder vivir e acabaron nos Estados Unidos.
Lizz wright
O programa do martes conta cunha das figuras do festival, Lizz Wright. Esta cantante, que se iniciou cantando na igrexa na que cantaba o pai, empezou a súa carreira no jazz ao unirse ao grupo de Atlanta, In The Spirit.
Os organizadores do certame, a asociación Escobijazz de Lugo, considera que «esta cantante está chamada a ser unha das cantantes con más personalidade e abrangue un variado abano de posibilidades interpretativas dentro dun amplo concepto do jazz».
A cantante actuará ás 21.30, no escenario do Círculo das Artes.
The Bee’s G.T. Trio abrirá a xornada ás 20.00 na Casa do Saber (Pazo de Montenegro). Brian Charette un dos máis importantes organistas de Nova York e que foi nominado dúas veces ao Grammy lidera este conxunto.
Músicos de toda España reuníronse no País Vasco para crear Citric, que soará ás 23.30 no club Clavicémbalo.
