É un dos 77 alumnos da primeira xeración que se formou no Instituto Laboral de Tapia e que o vindeiro día 9 se volve xuntar para lembrar a importancia sociocultural que o centro tivo tamén para a Mariña.
Fermín Rodríguez (Tapia de Casariego, 1942) pertence á primeira xeración de alumnos do Instituto Laboral tapiego. Polos anos 50 do pasado século, o réxime comezaba este tipo de formación, que chegou á vila asturiana en 1952. Concretamente o 20 de outubro dese ano comezou o primeiro curso.
Supuxo aquilo un cambio na perspectiva de futuro da xuventude?
Claro. Fomos moitos os rapaces que nos alistamos de primeiras -porque era masculino por aquel entón-, pero non era tan doado. Había que pasar uns exames de ingreso diante dun tribunal. Eu tiña dez anos cando entrei e compartía clase con xente de ata 20 anos. O instituto chegou e todo o mundo quería formarse.
Había moita xente matriculada?
Eramos 77 en total o primeiro ano. Despois algúns marcharon e outros repetían, pero eu sempre estiven en clases de máis de 40 persoas. Agora iso non pasa.
