Textos abstractos e debuxos con cores chamativas son as características nas que se sustenta a linguaxe común dos ‘graffitis’ que percorren os muros de cidades de medio mundo. Esta forma de creatividade urbana e ilimitada chegou tamén a Muimenta para encher de cor as súas rúas, grazas ao proxecto ‘graffitis no rural’, posto en marcha pola asociación Acapa Show cunha subvención do programa Iniciativa Xove da Consellería de Traballo e Benestar.
Na actividade, dirixida fundamentalmente aos rapaces da localidade, participaron preto de 30 persoas que colaboraron activamente en deixar «fermoso e atractivo» un dos muros do pabillón Francisco Javier López Anllo e a zona de reciclaxe próxima ao centro de saúde.
